Тайландын хаант Улсад суугаа Монгол Улсын Элчин сайд А.Төмөрийн гэргий Л.О өндрөөс унаж нас барсан хэрэг тавдугаар сарын 9-ний өглөө үүрээр гарсан. Талийгаач Л.Орхоны амиа алдсан шалтгаан нь санаандгүй осол уу, амиа хорлолт уу, эсвэл хүн амины хэрэг үү гэдгийг тогтоохоор Тайландын Бангкок хотын Цагдаагийн газраас мөрдөн шалгаж байгаа. Одоогоор шүүх шинжилгээний дүгнэлт гараагүй байгаа. Талийгаач Л.Орхоны ар гэрийнхний зүгээс эл хэрэгт нөхөр буюу Элчин сайд А.Төмөрийг буруутгаж буйгаа илэрхийлсэн. Харин Гадаад харилцааны яамнаас “Шүүх шинжилгээний дүгнэлтийг хүлээж байна. Дүгнэлт гарсны дараа Элчин сайд А.Төмөрийг хэрхэх асуудал яригдана” гэсэн товч тайлбар өгөөд байгаа билээ. 

Тэгвэл талийгаачийн эгч Л.Онон дээрх хэрэгтэй холбоотойгоор цахим сүлжээндээ олон нийтийг "Change.org"-д гарын үсгээ зурж, шударга ёсны төлөө нэгдэхийг уриалж эхэллээ. 

Change.org нь олон нийт өөрсдийн санаачилга, шаардлага, эсвэл асуудлыг олон нийтийн дэмжлэгтэйгээр шийдвэрлүүлэх зорилготой өргөдөл, петици үүсгэх боломжтой олон улсын платформ юм. Энэхүү вэбсайтыг иргэд, байгууллагууд, ТББ-ууд ашиглан нийгэм, улс төр, байгаль орчин болон олон төрлийн асуудлаар санал бодлоо илэрхийлж, дэмжигчдийн гарын үсгийг цуглуулдаг. 

Change.org нь:

•  Хувь хүн эсвэл байгууллагууд нийгмийн тодорхой асуудалд анхаарал хандуулахыг шаардах

• Нийт дэмжигчдийн хүчээр тухайн асуудалд шийдвэр гаргагчдыг (төр засаг, компаниуд, сургуулиуд гэх мэт) арга хэмжээ авахад хүргэх

• Ард иргэдийн дуу хоолойг нэгтгэж, бодит өөрчлөлт хийхэд түлхэц болох зорилготой аж.