АН-ын гишүүд намын дарга Л.Гантөмөр, бүлгийн дарга О.Цогтгэрэл нарт "Хамтарсан Засгийн газар"-аас гарах шаардлага хүргүүлж буй талаараа мэдээлэл хийлээ.

Энэ үеэр Ардчилсан намын гишүүд  "Монгол Улсын Үндсэн хуулийн 3.1, 3.2, 16.10, 16.16, 17.1.1, 39.2, Монгол Улсын Их хурлын тухай хуулийн 7.1, 7.2, 8.1.1, 8.1.11,  Монгол Улсын их хурлын сонгуулийн тухай хуулийн 1.1.1, 4.1, Улстөрийн намын тухай хуулийн 4.1 4.2, 4.2.1, 5.2 заалтуудыг илтэд зөрчин 2024.07.04-ний өдрийн Үндэсний бодлогын хороо, онлайн гэх хууль болон Ардчилсан намын дүрмийн бус хурал, УИХ дахь Ардчилсан намын бүлгийн шийдвэрээр Ардчилсан нам МАН-тай хамтарсан Засгийн газар байгуулах болсон хууль бус шийдвэрээ 2025 оны тавдугаар сарын 20-ны дотор нэн яаралтай цуцалж, хууль бус Засгийн газраас шаардаж байна. Уг шаардлагыг эс биелүүлвээс улстөрийн хатуу тэмцэлд шилжихийг Ардчилсан намын Үндэсний бодлогын хороо, Ардчилсан намын УИХ дахь бүлэгт хатуу анхааруулж байна. Бид шаардлагийнхаа хариуг автлаа АН-ын төв байрныхаа гадаа тэмцлээ үргэлжлүүлнэ. Ямар нэгэн байдлаар хариу өгөхгүй байх тохиолдолд тэмцлийн хурц хэлбэрт орно" гэлээ.

Мөн "Гүйцэтгэх засаглалын тэргүүн Л.Оюун-Эрдэнэ өнгөрсөн таван жилийн хугацаанд Ерөнхий сайдаар ажиллаж байна. Хөрөнгө орлогын мэдүүлгээс харахад өөрийн орлого нь 200 сая төгрөг, гэр бүлийн орлого нь 15 сая төгрөг боловч олон тэрбум төгрөгөөр хэмжигдэх  тансаг зэрэглэлийн худалдан авалтыг түүний хүү О.Тэмүүлэн хийж, олон нийтийн сүлжээнд иргэдээ басамжлан доромжилсон өнгө аястайгаар нийтэлсэн. Үүнээс үүдэн Засгийн газрын тэргүүнийг орлогоо нотлохыг шаардаж, иргэд жагсч байна. Үндэсний хэмжээний улс төрийн хүчин болсон Ардчилсан намаас зах хязгааргүй хулгайд улс төрийн хүчнийхээ үүргийг гүйцэтгэж ажиллахыг шаардаж байна" хэмээн байр сууриа илэрхийллээ.