Тайландын хаант Улсад суугаа Монгол Улсын Элчин сайд А.Төмөрийн гэргий Л.О өндрөөс унаж нас барсан хэрэг тавдугаар сарын 9-ний өглөө үүрээр гарсан. Хохирогч 17 давхраас 4-р давхрын тагтан дээр унаж, амиа алдсан байна. Талийгаачийн үхэл амиа хорлолт уу, гадны нөлөөтэй юу гэдгийг хууль хяналтын байгууллагаас шалгаж байгаа юм. Харин талийгаачийн ар гэрийнхэн өнгөрсөн долоо хоногоос эхлэн дүүгийнхээ үхэлд нөхрийг нь бас хувийн харилцаатай гэх жүжигчин эмэгтэйг нөлөөлсөн гэж цахим сүлжээнд бичиж эхэллээ. 

А.Төмөр гэж хэн бэ?

 Р.Төмөр нь Гадаад харилцааны яаманд 10 гаруй жил ажилласан байна. Сүүлд ГХЯ-ны Олон улсын гэрээ, эрхзүйн газрын захирлаар ажиллаж байсан тэрбээр 2020 онд анх удаа дипломат албан тушаалд томилогдож Тайландын Хаант Улсыг зорьсон бөгөөд тав дахь жилдээ элчин сайдаар ажиллаж байгаа аж. А.Төмөрийн аав нь Монгол Улсын Үндсэн хуулийн цэцийн дарга асан Ж.Амарсанаа юм. Тэрбээр Монгол Улсын гавьяат хуульч, академич, профессор бөгөөд хууль зүйн ухааны болон шинжлэх ухааны докторын зэрэгтэй нэр хүндтэй хуульчдын нэг байв. Ж.Амарсанаа 2012 онд Үндсэн хуулийн цэцийн даргаар томилогдож, 2016 онд огцорсон бөгөөд энэ үйл явцыг тухайн үед улс төрийн хэлмэгдүүлэлт байсан гэж зарим хүмүүс үздэг.

Түүний гэргий талийгаач Л.О нь Нортхэмптоны их сургуульд тусгай хэрэгцээт боловсролын чиглэлээр магистрын зэрэг эзэмшсэн бөгөөд Монголын соёлыг олон улсад сурталчлах, хүүхдийн боловсролыг дэмжих чиглэлээр идэвхтэй ажилладаг байв. Мөн “Thai Silk Road to the World” зэрэг олон улсын арга хэмжээнд Монголын төлөөллийг зохион байгуулж оролцуулж байжээ. Талийгаач “Элчин сайдын эхнэр гэдэг асар чухал үүрэг хариуцлага байдаг. Тайланд хүмүүсийн зочломтгой найрсаг зан чанарын ачаар мартагдашгүй үнэ цэнтэй цаг хугацааг өнгөрүүлж байгаа хэмээн Тайландын “Elite Plus” сэтгүүлд ярилцлага өгч байжээ.