Нэр бүхий 41 гишүүн санаачлан боловсруулсан Нийгмийн даатгалын ерөнхий хуульд нэмэлт, өөрчлөлт оруулах тухай хуулийн төслөө УИХ-ын даргад өргөн мэдүүллээ. Тэд төслөө өргөн мэдүүлснийхээ дараа сэтгүүлчдэд мэдээлэл хийсэн юм. 

УИХ-ын гишүүн Б.Түвшин "Олон удаагийн хэлэлцүүлэг хийсний үр дүнд 41 гишүүн гарын үсэг зурсан Нийгмийн даатгалын ерөнхий хуульд нэмэлт, өөрчлөлт оруулах тухай хуулийн төслийг УИХ-ын даргад өргөн барилаа. Хуулийнх төсөлд ажлын байр, иргэдийн бодит орлогыг нэмэгдүүлэх, ажил олгогчийг ажлын байраа нэмэгдүүлэх сэдлийг хангах гэсэн гурван үндсэн зохицуулалт бий. 

Нэгдүгээрт, Нийгмийн даатгалын ерөнхий хуульд байдаг зохицуулалтаас Иргэний хуулийн зохицуулалтын хөдөлмөрийн шинж чанартай зүйлээс албан журмын нийгмийн даатгал авдгийг болиулъя гэсэн заалт. Иргэн ажил хөдөлмөр гүйцэтгэхдээ орлогоосоо 20 хүртэлх хувийн нийгмийн даатгал төлж байгаа нь ажилгүйдлийг ихэсгэх, ажлын байрны үр ашгийг багасгаж байна гэж үзэж байна. 

Хоёрдугаарт, хоол, унаа, байрны ашиглалтын зардлын хөнгөлөлт зэргээс нийгмийн даатгал авдгийг болиулах. Энэ нь бодит орлогыг нэмэгдүүлэх, ажил олгогчид ажилчдадаа бодит хөнгөлөлт дэмжлэг үзүүлэх сэдлийг төрүүлэх үр дүнтэй гэж үзэж байна. 

Гуравдугаарт, байгууллагаас төлдөг нийгмийн даатгалын албан журмын хэмжээг хөдөлмөрийн хөлсний доод хэмжээг 10 дахин нэмэгдүүлсэн хэмжээгээр хязгаар тогтоох. Ингэснээр байгууллагын үр ашиг, ажлын байр нэмэгдүүлэх боломж олгоно гэж үзэж байна" гэв.