Хувь хүний орлогын албан татвар (ХХОАТ)-ын 10 хувийг нэг хувь болгох иргэний санаачилгыг 100,000 иргэн дэмжиж гарын зурсантай холбогдуулан хуулийн төсөл боловсруулсан асуудлаар УИХ дахь Ардчилсан Намын бүлгийн гишүүн өнөөдөр мэдээлэл өглөө. УИХ-ын гишүүн Ж.Баярмаа "Иргэн Р.Шинэгэрэлийн санаачилсан "Хувь хүний цалин, орлогоосоо төлдөг ашгийн татварыг 10% биш 1% болгож бууруулах" саналыг цахим өргөдлийн системд байршуулсныг долоо хоногийн дотор 100 мянган хүн дэмжсэн. Энэ саналыг хэрэгжүүлэх нь УИХ-ын гишүүд бидний үүрэг юм гэж үзээд хуулийн төсөл санаачлах талаар хоёр долоо хоногийн өмнө хэвлэлийн хурал хийж байсан. Энэ хугацаанаас хойш ХХОАТ-ыг 1 хувь хүртэл буулгах хуулийн төслийг боловсруулаад парламентын веб хуудас дээр байршуулсан.

Одоогоор "хуулийн төсөл боловсруулах" гэсэн статустай явж байгаа. Иргэд парламентын веб хуудас руу орж өөрсдийн саналаа бичээсэй гэж хүсэж байна. Мөн өнгөрсөн долоо хоногт өөрсдийн боловсруулсан хуулийн төслөө Засгийн газрын тэргүүн Л.Оюун-Эрдэнэд хүргүүлсэн. Татварын дарамт асар их байдгийг иргэд хэлж байна. Орлого нь амьдралд хүрэлцэхгүй байгаа иргэдээс өндөр татвар авч төсвийн зарлагад зарцуулдаг байдлыг зогсооё гэсэн саналтай байгаа. Яагаад гэвэл Монгол Улс гэдэг чинь монгол хүнээс бүрдэнэ. Монгол хүний орлого бага ч гэсэн нэмэгдэж байж тухайн улсын хөгжил яригдана. Түүнээс биш өөрсдийн хөдөлмөрлөж олсон цалин хөлс амьдралд хүрэлцэхгүй байгаа дээр нь татварын дарамт учруулдаг нь эдийн засгийн хүндхэн нөхцөлд ямар ч боломжгүй юм. Тиймээс ХХОАТ-ын зургаан төрлийг 1 хувь болгох хуулийн төслийг санаачилж боловсруулсан. Хуулийн бүх процесс явж дууссаны дараа УИХ-ын даргад өргөн барина. Иргэн баян бол улс баян гэх үг бий. Бид иргэдээ баяжуулдаггүй юм гэхэд ядаж татварын дарамтаас бага зэрэг чөлөөлөөсэй. Есөн хувийн мөнгийг өөрсдөд нь үлдээгээсэй гэсэн зорилгын хүрээнд хийж байна. Жишээлбэл хоёр сая төгрөгийн цалинтай хүн ХХОАТ-ын есөн хувиа төрд хураалгахгүй бол 180 мянган төгрөг авч үлдэнэ. Энэ мөнгө иргэдэд бодит орлого болж хувирна. Ядаж нэг шуудай гурил, уут будаагаа аваг ээ. 180 мянган төгрөг төрөөс төрсөн тэрбумтнуудад юу ч биш байх. Цайны хэмжээний мөнгө байх. Гэтэл иргэдэд энэ нь маш их мөнгө. 2025 төсвөөр тооцвол 2.5 их наяд төгрөгийн зөрүү гарна. Үүнийг бүрдүүлэхэд маш амар. Жишээлбэл 2026 оны төсвийн орлогыг тооцоолохдоо 2.5 тэрбум төгрөгийн дүнг хасаад төсөвлөнө" гэх мэдээллийг өглөө.