Байгаль орчны яамныхан долоо хоногийн нэг өдөр зайнаас ажиллана. Байгаль орчин, уур амьсгалын өөрчлөлтийн яамны албан хаагчид тавдугаар сараас эхлэн долоо хоногийн ажлын нэг өдрийг зайнаас ажиллах горимд шилжүүлэхээр болжээ. Хөдөлмөрийн бүтээмж, ажилдаа сэтгэл ханамжтай байдал, ажилтнуудын цахим хэрэгслээр ажиллах ур чадварыг нэмэгдүүлэх, хотын түгжрэлд зарцуулах цагийг багасгах, төсвийн байгууллагын зардлыг хэмнэх, дижитал шилжилтийг дэмжиж, соёлын өөрчлөлт хийх зорилгоор энэ өөрчлөлтийг хийж байна гэдгийг ТНБД Ц.Уртнасан онцоллоо.

Ажилчид онлайнаар ажиллах өдрөө өөрсдөө сонгох юм. Мөн нэг ажилтан нэг ажлын байрны бүх мэдээлэл, тоног төхөөрөмж, техник хэрэгсэл өмчилдөг байдлыг халж, ажлын байрны өндөр зардлыг бууруулж, үйлчлүүлэгчдийн сэтгэл ханамж, гүйцэтгэл, үр дүнд суурилсан ажлын үнэлгээний тогтолцоог нэвтрүүлнэ гэж үзжээ.