Гадаадын тагнуулын байгууллагатай хамтран ажилласан гэх Монгол Улсын иргэн Д.Нямжавд холбогдох хэргийн давж заалдах шатны шүүх хурал өчигдөр /2025.04.24/ болж, түүнд анхан шатны шүүхээс оноосон найман жилийн ялыг хэвээр үлдээж, гомдол, эсэргүүцлийг хэрэгсэхгүй болгон шийдвэрлэжээ.

Тодруулбал, Монгол Улсын иргэн Д.Нямжавд холбогдох хэргийг /2025.01.27/ нийслэлийн Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхээр хаалттай хэлэлцэж, түүнийг гадаадын тагнуулын байгууллагатай хамтран ажилласан гэм буруутайд тооцож, найман жил нээлттэй хорих ангид ял эдлүүлэхээр болсон гэдгийг албаныхан мэдээлж байсан юм. Харин Д.Нямжав нь анхан шатны шүүхийн шийдвэрийг эс зөвшөөрч, давж заалдах шатны шүүхэд гомдол гаргаад байсан билээ.

Прокурорын байгууллагаас Эрүүгийн хуулийн 19.4.1 дэх хэсэгт зааснаар буюу Монгол Улсын иргэн гадаад улсын тагнуулын албатай хамтран ажиллахаар тохиролцсон, хамтран ажилласан, гадаадын байгууллага, иргэнд шилжүүлэн өгөх зорилгоор төрийн нууцад хамаарах мэдээ, баримт, эд зүйлийг хулгайлсан, цуглуулсан, хадгалсан, дамжуулсан гэх зүйл ангиар яллаж, шүүхэд шилжүүлсэн байдаг.

Эрүүгийн хуулийн 19.4.1 дүгээр зүйл Гадаадын тагнуулын алба, байгууллага, иргэнтэй хууль бусаар хамтран ажиллах "Монгол Улсын иргэн гадаад улсын тагнуулын албатай хамтран ажиллахаар тохиролцсон, хамтран ажилласан, гадаадын байгууллага, иргэнд шилжүүлэн өгөх зорилгоор төрийн нууцад хамаарах мэдээ, баримт, эд зүйлийг хулгайлсан, цуглуулсан, хадгалсан, дамжуулсан бол найман жилээс , 15 жил хүртэл хугацаагаар хорих ял шийтгэх хуулийн заалттай.