УИХ-ын чуулганы үдээс өмнөх нэгдсэн хуралдаанаар Гаалийн албан татвараас чөлөөлөх тухай хуулийг хүчингүй болгох тухай хуулийн төслийг хэлэлцлээ. Өнгөрсөн жил дотоодын гурилын хэдхэн компаниуд үгсэн хуйвалдах замаар үнээ 78 хувиар нэмсэнээс үүдэж хэрэглэгчдийн эрх ашгийг хангах зорилгоор гурил, малын тэжээлийн импортын татварыг тэглэх шийдвэр гаргасан. Харин одоо ХХААХҮЯ-аас гурилын үйлдвэрүүд хүнд байдалд орсон учраас уг шийдвэрийг хүчингүй болгуулах тухай хуулийн төсөл өргөн барьсан учраас УИХ-аас хэлэлцэж байна. УИХ-ын гишүүн Б.Баярбаатарын зүгээс өнгөрсөн хугацаанд 10 аж ахуй нэгжид төрөөс 212 тэрбум төгрөгийн хөнгөлөлттэй зээл олгосон ч гурилын үнэ хэт нэмэгдсэн асуудлыг хөндөөд байгаа юм. Тухайлбал, 2019 онд үйлдвэрлэгчид нийт 210 000 тн гурил үйлдвэрлэж, 240 тэрбум төгрөгийн борлуулалт хийсэн.

Харин 2023 онд 190 000 тн буюу 20 000 тн-оор бага гурил үйлдвэрлэсэн мөртлөө борлуулалт нь 430 тэрбум төгрөг болж нэмэгджээ. Өөрөөр хэлбэл 2669 төгрөг байсан дээд гурил 3207 төгрөг болтлоо нэмэгдсэн нь компаниудын борлуулалтын орлого нэмэгдэх гол шалтгаан болсон байна. Харин ХХААХҮ-ын сайд Ж.Энхбаярын зүгээс дэлхийн зах зээл, үр тарианы гарцаас үүдэж гурилын үнэ тогтдог талаар дурдаад, 2025 онд гурилын үнэ тогтвортой байгаа талаар мэдээллээ. Тус хуулийн төслийг хүчингүй болгосноор эргээд гурилын үнэ огцом нэмэгдэхвий гэсэн болгоомжлол үүсэж байгааг УИХ-ын гишүүд сануулж байна.