Хан-Уул дүүргийн наймдугаар хороонд гэр хорооллын дахин төлөвлөлтийн төсөл хэрэгжүүлэхээр “Ивээлт Цамхаг констракшн’’ ХХК-ийг 2021 онд батламжилсан ч тухайн компанийн буруутай үйл ажиллагаанаас болж уг төсөл хэрэгжихгүй бүрэн зогсож, газраа чөлөөлсөн 16 айл өнгөрсөн жилүүдэд хохирсон байдаг. Иймд Нийслэлийн Засаг даргын 2024 оны зургаадугаар сарын 25-ны өдрийн А/778 дугаар Захирамжаар тухайн компанийн төсөл хэрэгжүүлэх эрхийг цуцалсан бөгөөд 2024 оны есдүгээр сарын 18-ны өдрийн А/1092 дугаар Захирамжаар тухайн байршлын газрыг дахин төлөвлөн, барилгажуулах төсөл хэрэгжүүлэгчээр, гэрээ байгуулах эрх олгож ажиллахыг Нийслэлийн Орон Сууцны Корпорацид даалгасан байдаг.

Тэгвэл өнөөдөр /2025.04.24/ Нийслэлийн Орон сууцны бодлогын газрын дарга Г.Ганхүү, Нийслэлийн Орон Сууцны Корпорацийн Гүйцэтгэх Захирал М.Говьсайхан болон албаны бусад хүмүүс тус төсөлд хамрагдаж, хохирсон 16 иргэнийг хүлээн авч уулзаж, цаашид хийж хэрэгжүүлэх ажлаа танилцуулж, гарц гаргалгааг ярилцлаа. Уулзалтын үеэр НОСК-ийн Гүйцэтгэх Захирал М.Говьсайхан: ‘’Тухайн газар чөлөөлсөн байршилд орон сууцны барилга барих төсөл хэрэгжүүлэгчийг сонгон шалгаруулах тендерийг дахин зарлахад бэлэн байгааг онцлоод дараагийн төсөл хэрэгжүүлэгчийг сонгон шалгаруулахдаа санхүүгийн чадамжтай, хөрөнгө оруулагч барилгын компани байх шаардлагыг тавина ‘’гэсэн юм.

Харин иргэд тус байршлын газрыг дахин төлөвлөн, барилгын компанийн сонгон шалгаруулалтыг Нийслэлийн Орон Сууцны Корпорациас хийх болсонд баяртай байгаагаа илэрхийлээд, холбогдох материал болон мэдээллээр хангаж ажиллахаа хэлсэн юм. Ташрамд, “Ивээлт Цамхаг констракшн’’ ХХК тухайн төсөлд хамрагдсан иргэдтэй гэрээ байгуулахдаа орон сууцны барилга ашиглалтад орох хүртэлх хугацаанд түрээсийн төлбөрийг хариуцна гэсэн ч түрээсийн төлбөрөө хугацаа хэтрүүлэн өгөх, зарим тохиолдолд өгөхгүй байдгаас үүдэн иргэд түрээсийн орон сууцнаасаа хөөгдөх асуудлууд ихээр гарч байсан тул Нийслэлийн Орон Сууцны Корпорациас өнгөрсөн оны 11 дүгээр сард тухайн хохирсон иргэдийг түр суурьшуулах орон сууцаар хангасан.