Монголын Хөрөнгийн бирж IPO гаргаж 34 хүртэл хувь нь олон нийтэд нээлттэй болсон. Тиймээс иргэдийг хувьцаанаас авахыг тус Биржийн Гүйцэтгэх захирал Б.Дөлгөөн санал болгов. Тэрбээр “Би захирлын хувьд манай компаний хувьцааг аваарай л гэж захих байна. Хөрөнгийн бирж дээр өөрийнх нь хувьцаанаас гадна нэгдүгээр самбарт чанартай, алга болохооргүй итгэл найдвартай компаниудын хувьцаа зарагддаг” гэлээ.

Өнөөдрийн байдлаар Монголын хөрөнгийн биржийн хувьцаа 250 орчим төгрөгөөр арилжаалагдаж байна. Өнгөрсөн Даваа гарагт Монголын хөрөнгийн биржийн хувьцаа эзэмшигчдийн хурал болж нэг ширхэг хувьцаа бүртээ 47 төгрөгийн ногдол ашиг тараасан байна. Тус хуралд “Монголын хөрөнгийн бирж” ХК-ийн саналын эрхтэй нийт 350,463,539 ширхэг хувьцаанаас 66.76 хувь буюу ширхэг хувьцаа эзэмшиж буй 240,991,242 ширхэг хувьцаа эзэмшиж буй 64 хувьцаа эзэмшигч оролцсон байна.

Тэгвэл иргэд хувьцаа эзэмшихийн тулд заавал их мөнгөтэй байх шаардлагагүй болохыг Гүйцэтгэх захирал Б.Дөлгөөн яриандаа онцолж байлаа.

Тэрбээр “Заавал их мөнгөтэй байж арилжаа хийнэ гэсэн нөхцөл байхгүй. Том дүнгээс илүү бага дүнгээр тухайн арилжаанд оролцож алдаж, онож, хувьцаа бондны үнийг тодорхойлогч санхүүгийн онол логикт тулгуурлан илүү анализ хийж сурахын хэрээр илүү томоохон хөрөнгө оруулалт хийвэл хөрөнгийн зах зээл дараагийн эдийн засгийн хөдөлгүүр болж чадна. Хөрөнгийн зах зээл рүү орно гэдэг нь яах аргагүй баялаг бүтээгчдийг дэмжиж эдийн засгийн хөгжилд хувь нэмрээ оруулахаас гадна, таны оруулж буй хөрөнгө оруулалт чинь үр хүүхэддээ үлдэж чадах өв болно гэсэн үг” гэж байлаа.

Сануулбал, 2022 оны дөрөвдүгээр сарын 29-ны өдөр батлагдсан “Төрийн өмчит хуулийн этгээдийн хувьцааг 2022-2023 онд биржээр олон нийтэд нээлттэй худалдаалах үндсэн чиглэл”-ийн хүрээнд төрийн өмчийн 26 компанийг түүчээлэн Хөрөнгийн бирж олон нийтэд нээлттэй хувьцаагаа санал болгоод байгаа юм.