Засгийн газар бизнесийн салбартай өрсөлдөхгүй хэмээн мэдэгдэж байгаа ч эсрэгээрээ харьяа агентлагууддаа нэмэлт орлого олох үүрэг даалгавар өгч эхэлсэн. Энэ хүрээнд ч Засгийн газрын авто бааз төлбөрт үйлчилгээ үзүүлэхээр болсноо зарлаад байна. Энэ нь төр бизнестэй өрсөлдөхгүй гэсэн зарчимтай харшилж буй.

Тэгвэл энэ талаар хуульч О.Батхүү өөрийн цахим хуудаснаа "Жилд 2-3 удаа хөдөө явахын тулд том жийп унах хэрэггүй гэж боддог олон хүн бий. Хөдөө явахаар бол цоо шинэ 570, 300 түрээсээр авдаг. Энэ бол хувийнхны бизнес. Өрсөлдөөнтэй учир үнэ буурч, сонголт нэмэгдэж байгаа. Гэвч ЗГ хүч түрэн орж ирэв. Өрсөлдөнө гэнэ. Төр мэдээж хямд үнэ санал болгоно. Яагаад гэвэл тэд татварын мөнгөөр, хувийнхан банкны зээлээр машинаа авдаг. 2-3 жилийн дараа энэ салбар өрсөлдөгчгүй болж дампуурна. Энэ үед Засгийн бааз үнэ нэмнэ. Машин авахын тулд танил талруугаа ярьж, таван цаас атгуулдаг болно. Хэн хохирох нь ойлгомжтой. Төрд хийх ёстой үй түмэн ажил бий. Гэтэл зочид буудал барина, хоол хийж зарна, одоо бүр таксинд явах юм байна. Нэртэйгээр нь бүх өмч хөрөнгө хураагаад коммунизмаа байгуулсан нь дээргүй юу" гэж бичжээ.