Үнэхээр УИХ-ын гишүүн Б.Энхбаярын хэлсэн шиг “Хамтарсан гэх халхавчаар  “Женко” Х.Баттулгын туслахаас эхлээд ойрын хүрээллийн хүмүүсийг гол албан тушаалд тавьсан”  бол энэ томилгоо дан ганц Ерөнхий сайд Л.Оюун-Эрдэнийн шийдвэр байх учиргүй. Хамтарсан засгийн газарт эрх бүхий албан тушаалын томилгоог АН,ХҮН-аас оруулж ирж байгаа.

Тэгэхээр Х.Баттулгын ойрын хүмүүс төрийн өндөр албан тушаалд томилогдсон бол энэ нь Ардчилсан намын оруулж ирсэн санал юм. Нэг ёсондоо АН өөрөө Х.Баттулгын нам болжээ гэдгийг тод томруунаар харуулж буй хэрэг.

УИХ-ын гишүүн Б.Энхбаярын яриа оргүй хоосон биш гэдгийг илтгэх хэд хэдэн томилгоог харья. Тухайлбал, Б.Саруул ЗГХЭГ-ын дэд даргын үүрэг гүйцэтгэгчээр томилогдсон.

Х.Баттулгыг Ерөнхийлөгч байхад Тамгын газрынх нь дэд даргаар ажиллаж байсан. “Талх Чихэр” ХК, “Мах Импекс” ХК-иудын менежмент хариуцсан газрын Маркетингийн албаны даргаар ажиллаж байсан намтартай.

АН-ын дарга асан И.Мөнхжаргал "Эрдэнэт үйлдвэр" ТӨҮГ-т хяналт хариуцсан менежерээр томилогдсон. 

П.Нүрзэдийг Улаанбаатар төмөр зам компанийн хяналт хариуцсан менежерээр томилсон.

Ховд аймгийн АН-ын гишүүн Н.Пунцаг “Эрдэнэс тавантолгой” ХК-ийн хяналт хариуцсан менежерээр томилогдсон.

Эрчим хүчний сайд асан Д.Зоригтын туслах асан Н.Жавзанпагма “Эрдэнэс Монгол” ТӨХК-ийн хяналт хариуцсан менежерээр томилогдсон.

 Г.Болормаа ХЗДХ-ийн яаманд Газрын дарга болсон гэдэг ойрын жишээнүүдийг харж болно.

Сүүлийн хэдэн жил АН дотроо хагаралдаж нийгэмд эзлэх байр сууриа алдаж байсан хэдий ч хагарч бутарсан АН-ын удирдлагуудаар Х.Баттулгын ойрын хүмүүс томилогдон ажиллаж байсан гэдгийг улс төр сонирхогч хэн бүхэн мэднэ.