Хотын дарга Х.Нямбаатар "Нийслэлийн Засаг дарга 204 хорооны 470,000 га нутаг дэвсгэрт хаана нь юу болж байгааг очиж үзэж, засаж залруулах боломж бага. Хорооны Засаг дарга нар бүх гудамж талбайгаар явж, хэрхэн тохижуулах, стандартын шаардлага хангахгүй байгааг нэг бүрчлэн зурагжуулж өгнө. Дүүргийн Засаг дарга нар эдгээр саналын дагуу засвар, шинэчлэл хийх төлөвлөгөөг гаргана.

Улаанбаатар хотын явган хүний болон авто замын бүх хайс, хашлагыг 4, 5 дугаар сард будаж дуусгана.

Энд тэндгүй явган хүний болон автомашины зам дагуу ус тогтож, хүмүүс өндрийн харайлтад орж байгаа юм шиг амьдарч байна. Хорооны Засаг дарга нар энэ асуудлыг шийдэх мөнгөгүй гэж зовлон ярьдаг. УБЗАА-нд энэ жил хуваарилагдсан тохижилтын ажлын мөнгөнөөс 50% буюу 10 тэрбум төгрөгийг хороо, дүүрэгт хуваарилж эдгээр засвар, тохижилтод зарцуулна. 

Өөрөөр хэлбэл хариуцсан нутаг дэвсгэрийг тохижуулж, цэвэр цэмцгэр болгох үүргийг хороо, дүүргийн Засаг дарга нарт өгч байгаа юм.

Тэднийг ажил үүргээ хэрэгжүүлж байгаа эсэхэд Нийслэлийн Хяналт Шалгалтын Газраас/НХШГ/ үнэлгээ тавина. Оны төгсгөлд дүгнэнэ. Ажил хийх боломж нөхцөлүүдийг санал болгож байхад ажил хийхгүй бол хорооны Засаг дарга нарыг өөрчлөх, чөлөөлөх асуудлыг иргэдийн нийтийн хурлыг зарлаж ярина" гэв.

Нийслэлийн 2025 оны төсвөөс Баянгол, Баянзүрх, Сүхбаатар, Чингэлтэй, Хан-Уул, СХД-т нийт ₮288.4 тэрбум, нийслэлийн төсвөөс алслагдсан гурван дүүрэг болох Багануур, Багахангай, Налайх дүүрэгт олгох санхүүгийн дэмжлэгийг 16.4 тэрбум төгрөг байхаар тооцож, баталжээ. Үүн дээр нэмж 10 тэрбум төгрөгийг дүүргүүдэд хувааж олгох юм байна.