Сууц өмчлөгчийн холбоо /СӨХ/-ны төлбөрөө цаг хугацаандаа төлдөггүй иргэний СӨХ-ын төлбөрт нь алданги тооцох, цаашлаад Монголбанкны хар жагсаалтад оруулдаг байх зохицуулалтыг Орон сууцны болон орон сууцны бус зориулалттай байшингийн дундын өмчлөлийн эд хөрөнгийн менежментийн тухай хуулийн төсөлд тусгажээ. Онцлоход, СӨХ-ны төлбөрөө гурваас дээш сар төлөлгүй хэтрүүлсэн тохиолдолд хоног тутамд 0.5 хувиар алданги тооцох, зургаан сараас дээш хугацаагаар төлөөгүй тохиолдолд мэдээллийг Монголбанкны Зээлийн мэдээллийн санд бүртгүүлж, банк санхүүгийн байгууллагаас зээл авах боломжийг нь хязгаарлах зохицуулалтыг тусгаж өгсөн байна.

Мөн СӨХ-г хариуцлагажуулах, сар бүр авч буй төлбөрийг хэрхэн зарцуулсан талаарх зардлыг гурван сар тутамд тайлагнаж байхаар хуулийн төсөлд заасан. Үүнээс гадна төлбөрийг зориулалт бусаар ашиглаж, хувьдаа завшихаас сэргийлэх, барилгын компани СӨХ байгуулчхаад алга болдог асуудлыг зогсоох зорилгоор иргэдийн байгуулсан СӨХ-тэй гэрээ хийж, менежментийн үйлчилгээ үзүүлдэг байх зэргийг хуульд нарийвчлан тусгажээ.  Энэхүү хуулийн төслийг УИХ-ын гишүүн О.Номинчимэг нарын гишүүд санаачлан боловсруулсан бөгөөд энэ хаврын чуулганы хугацаанд өргөн мэдүүлэх юм.