2019 онд Баянхонгор аймгийн Богд сумын Түйн голд гүүр барих 990 сая төгрөгийн төсөв бүхий  тендерийг зарлажээ. Гэвч зураг төсөв нь хийгдээгүй зөвхөн 35 метр гүүрийг 990 сая төгрөгөөр барина гэсэн тендерт нэг ч компани санал өгөөгүй учир яамнаас зам гүүрийн компаниудад санал тавьснаар “Хөх байгаль” компани 970 саяын санал өгч тендерийг авчээ.  Ингээд “Хөх байгаль” мэргэжлийн компаниудтай хамтран судалгаа хийж, координатыг тогтоон зураг төслийг батлуулж өөрсдийн хөрөнгөөр ажлаа эхлүүлжээ.

Гэвч өнөөг хүртэл тус компани улсаас нэг литр түлшний мөнгө ч авч чадалгүй хохирч, харин эхлүүлсэн ажлыг нь Баянхонгор аймгийн засаг дарга Д.Мөнхсайханы эхнэрийн “Ихбогд зам” компани 3.2 тэрбум төгрөгөөр гүйцэтгэжээ. Өөрөөр хэлбэл өнгөрсөн таван жилийн хугацаанд төсвийн өртөг 970 саяас 3.2 тэрбум болтлоо өсч, суурийг нь тавьж ажлын ихэнхийг нугалсан залуус хоосон хоцорчээ.  Богд суманд тухайн гүүр баригдана гэж олон жил яригджээ. Нутгийн иргэд гүүргүйн улмаас зуугаад  км тойрох, усанд үйж амь насаа алдах тохиолдол ч гарч байж. Харин төсөв бага гээд компаниуд голж байсан тендерийг нутгийн залуу зоригтойгоор барьж авч эхлүүлсэн ч өнөөдөр өөрөө хохирч хоцорчээ. “Хөх байгаль” компанийн хийж бүтээж эхлүүлснийг нутгийн иргэд ярьж байна. Гэвч ажлыг эхлүүлэн нурууцуулсан “Хөх байгаль” компани өрөнд орон хоосон хоцорч, бэлэн суурийг нь бетоноор холбосон Д.Мөнхсайхан даргын “Ихбогд зам” компани хэдэн тэрбумаар нь авснаар Түйн голд гүүр сүндэрлэжээ.

“Хөх байгаль” компанид “Ах нь ажлыг нь дуусгахаас өөр арга танай мөнгийг гаргаж өгнөө” хэмээн амалж байсан засаг дарга өнөөдөр надад ямар ч хамаагүй, тусдаа гүйцэтгэл би нийгмийн хариуцлагын хүрээнд аймгийн тендерүүдийг авдаг, болохгүй юм бол больчихьё хэмээн туниж суухад ажлыг эхлүүлсэн залуус  улсаас хэдэн төгрөгөө салгаж авах гэж эрх мэдэлтэн бүрийг царайчилж явна.

Ард иргэдийн амьдралд дэмтэй, аюул ослоос хамгаалсан хэрэгтэй бүтээн байгуулалт говьд хийгдсэн ч мэргэжлийн компани залуу инженерүүд хохирч хоцорсон будлиантай тендерийн эхний гүйцэтгэлийн санхүүжилт ийнхүү эрх мэдэлтнүүдийн дунд замхарчээ. Ер нь Д.Мөнхсайхан даргын “Ихбогд зам” компани Баянхонгор аймагт зарлагдсан тендерүүдийг хамаад авчихдаг тухай орон нутгийнхан ярьж байв. Сүүлийн жишээ л гэхэд “Шаргалжуут” рашаан руу тавих засмал замыг эднийх хийхээр болжээ. Дараагийн удаа Д.Мөнхсайхан даргын компанийн авсан бүхий л тендерийг танилцуулах болно.