Бүсчилж томсгосон тойрог, намын жагсаалт хослуулсан холимог тогтолцоогоор, анх удаа 126 гишүүнтэй бүрдсэн УИХ-ын ес дэх удаагийн сонгуулиар байгуулагдсан шинэхэн парламент бий болоод даруй нэг жилийн нүүрийг үзэх гэж байна. Архаг улс төрчдөөс эхлээд ардын багш, лайвчин, сэтгүүлч, жүжигчин, эрүүгийн гэмт хэрэгтэн гээд элдэв асуудлын бай болсон эздээр дүүрэн их хурал бүрджээ. Түүхэндээ их хурлын гишүүд хоорондоо зодолдож ордны цонхоор “морь” харсан гэх элдэв цуурхал байснаас биш санаандгүй мөргөлдсөн гэдэг үгээр халхавч хийж хөмсгөндөө хоёр оёдол тавиулсан тохиолдол ховорхон билээ. Өнгөрсөн долоо хоногийн асуудлын бай болсон боловсролын сайд П.Наранбаяр, УИХ-ын гишүүн Д.Найдалаатай зодолдоогүй гэж хэлсэн ч өөрөө хөх нүдтэй хоцорч өнөөх нь хагалгаанд орсон гэх.

Намрын чуулганаас хойш улс төр хийж цахим орчинд шуугиан тариагүй ч “хэрүүл маргаанаар” олны амны бай болж буй хүн М.Нарантуяа буюу Нара гишүүн. Ард түмний итгэлээр төр түшилцэж яваагаа умартан ажлаа тасалж  “лайв хийж бараа зарсан” хэргээр ёсзүйн байнгын хорооноос сануулга авсан. Гэвч түүний төрөлх араншин ордонд бус цахим орчинд засрахгүй л явна. Хүүхэд эмэгтэйчүүдийн дуу хоолой болж гарсан тэрбээр эргүүлээд хүүхэд эмэгтэйчүүдээ доромжилж олны эгдүүг хүргээд авлаа.

УИХ-ын гишүүн Д.Цогтбаатарыг гурван шатны шүүхээс гэм буруутай гэж үзсэн. Улмаар гишүүний бүрэн эрхийг түдгэлзүүлж, эргүүлэн татах тухай яригдаж байгаа.  Гэтэл шүүхийн шийдвэрийг үл тоож эсэргүүцсэн хэвээр. Тэгэхдээ бүр миний ял эдлэх хугацааг хойшлуулж өгөөч хэмээн Улсын дээд шүүхийн эрүүгийн хэргийн танхимын шүүгчид хүсэлт хүргүүлээд явж байгаа. Өөрөөр хэлбэл энэ хүн дөрвөн жил их хурлын гишүүн суумаар байна гэдгээ энэ хүсэлтээрээ илэрхийлээд байгаа хэрэг юм.

126 гишүүнтэй их хурлын паян үүгээр дуусахгүй ээ. Чуулганы хуралдаа ирдэг, оролцдог гишүүд тун ховор. Ихэнх нь давхар дээлтэй учир засгийн хурал, байнгын хорооны хуралдаа сууж байна гээд чуулган таслах асуудал дуусахгүй. Экс ерөнхийлөгч Х.Баттулга гэхэд намрын чуулганаас хойш ажилдаа ирсэнгүй. Энэ хүн  их хурлын гишүүн гэдэгээ умартаад өөрийгөө ерөнхийлөгч хэмээн сэтгэж “Үндэсний баялагийн сангийн тухай” хуулиа хэрэгжүүлье гээд монгол орноор бүрэн тойрч иргэдтэй уулзаад яваа. Угтаа бол энэ ажлыг Х.Баттулга хийхгүй ээ. Энэ хүн чуулгандаа ирж хуулиа батлах үүрэгтэй хүн.

Ийм л өнгө өнгийн том жижиг толгойтой элдэв хэргийн эзэд их хурлын гишүүнээр заларчхаад иргэдийг элдэвлээд яваа. Гэтэл 90 хувийн саналаар их хурлын даргаар сонгогдсон Д.Амарбаясгалан танхимын гишүүдээ зангидаж атгандаа оруулж чадахгүй байх шиг. Монгол төрийн босго өндөр хэмээн өвөг дээдэс ярьж ирсэн түүхтэй. Энэ л өндөр  босгоор өнхрөөд ороод ирсэн ёс зүйгүй гишүүдээ Д.Амарбаясгалан дарга та ядаж төрийн ордонд хэрхэн биеэ авч явах талаар нь хичээл сургалт оруулбал ямар вэ. Архаг улс төрчдөд энэ их хурал багадаад жагсаалтын гишүүдэд томдоод байх шиг. Арга ядахдаа Д.Амарбаясгалан ажилдаа ирдэг гишүүдэд урамшуулал олгоно гээд яриад сууж байхав. Угтаа бол олон жил намын генсек хийхдээ ардын намыг удаа дараа  сонгуульд ялуулж удирдах арга барил, стратеги төлөвлөгөө гаргахдаа хэнийг ч дагуулахааргүй лидер болсон хүн. Гэтэл цэнхэр, улаан ялгаагүй олон жил их хуралд суусан эрх мэдэл, хөрөнгө мөнгө ихтэй Д.Батлут, Ж.Ганбаатар,  Б.Пүрэвдорж, Х.Баттулга нарыгаа захирч чадах зангараг түүнд дутаад байх шиг.