Хөгжлийн банкны Стратеги төлөвлөлт, бизнес хөгжүүлэлтийн газрын захирлаар Л.Болормаа томилогдлоо. 

Тэрбээр, Говь-Алтай аймгийн Жаргалан суманд төрж Тонхил суманд өссөн. Эрх зүйн магистр бөгөөд АНУ, БНСУ-д мэргэжил дээшлүүлсэн. Төрийн албанд 18 жил ажилласан. Хүний эрхийн төлөв байдал, хөдөөгийн хөгжил, бага дунд боловсролтой иргэдийн эрх зүйн байдал зэрэг суурь судалгаанууд, нийгмийн чиглэлийн 21 төсөл хөтөлбөрийг олон улсын байгууллагуудтай хамтран хэрэгжүүлжээ. Мөн 10 гаруй төслийн зөвлөхөөр ажилласан. 

2024 оны УИХ-ын сонгуульд АН-ын жагсаалтын 30-д эрэмбэлэгдсэн. 2018-2025 онд АН-ын Нийгмийн дэвшил эмэгтэйчүүд хөдөлгөөн ТББ-ын Ажлын албаны даргаар ажиллаж байгаад Хөгжлийн банкны газрын захирлаар томилогдож байна.  Тус газрын захирал нь Маркетинг, олон нийттэй харилцах хэлтэс, Зах зээлийн судалгаа, төслийн хөгжүүлэлтийн хэлтэс, стратеги төлөвлөлт, бодлогын хэлтсийг удирдан чиглүүлж ажиллах юм.