Хоёрхон хоногийн өмнө Боловсролын сайд П.Наранбаяр "ХҮН нам засгийн газрын бүрэлдэхүүнд орчхоод жаргаад байгаа юм алга" хэмээн цухалдуу үг шидсэн. Учир нь түүнийг Боловсролын салбарыг будлиантуулж байгаа асуудлууд ар араасаа ундарсаар байгаа юм. Орон нутагт сургууль, цэцэрлэгийн захирлуудыг сольж, шинээр боловсон хүчин ажилд авахдаа ХҮН-д элсэхийг шаарддагг, салбарыг түшиж намаа бэхжүүлэх ажил хийж байна гэх шүүмжлэлээр чичлүүлсэн. Үүнтэй зэрэгцээд Шинэ монгол ТББ руу сургуулиудаар дамжуулан 1,2 тэрбум төгрөг гаргасан гэх асуудал нь ч хурцсав. "Шинэ монгол" сургуулийг МАН-аас жагсаалтаар УИХ-ын гишүүн болсон Ж.Галдбадрах үүсгэн байгуулсан, харин П.Наранбаяр "Шинэ монгол" сургуулийн II үеийн захирал гэгддэг.  Тухайн мөнгө нь Сургуулийн менежментийг сайжруулах төсөл нэрээр "Шинэ монгол төв" ТББ хэрэгжүүлэн тус тус 10 саяыг өөр дээрээ авч, төвлөрүүлсэн гэх сургуулиуд дээр хэрэгжүүлж байгаа юм. 

Сайд энэ тэрхнээ ийнхүү тайлбарлаж байтал өчигдөр /2025.03.27/ үдээс хойш төрийн ордонд ХҮН намаас жагсаалтаар УИХ-ын гишүүн болсон Б.Найдалаатай зодолдож, гэмтэх бэртэхдээ тулжээ. Маргааны улмаас П.Наранбаяр хувийн эмнэлэгт очиж шаардлагатай тусламж үйлчилгээг авсан бол, цагдаагийн байгууллагад Боловсролын сайдын биед УИХ-ын гишүүн цохиж биед нь хохирол учруулсан гэх утгаар мэдээлэл бүртгэгдэж, шалгалтын ажиллагааг эхлүүлжээ.