Нийслэлийн Иргэдийн Төлөөлөгчдийн Хуралдаан (НИТХ)-аар Нийслэл Улаанбаатар хотод “Метро”-г байгуулах төслийн шинэчилсэн техник, эдийн засгийн үндэслэлийг (ТЭЗҮ) дэмжих тухай хэлэлцсэн.

НИТХ-ын төлөөлөгч О.Зундуйдорж "Айлаас эрэхээр авдраа ух гэдэг. Бид газар доогуур бүтээн байгуулалт хийж байсан туршлагатай. 1,300 метрийн гүнд 200 километрийн гүний уурхайн туршлагатай ард түмэн. Түүнээс биш амьдралдаа анх удаа хоолой ухах гэж байгаа юм биш. Та бүгдэд би 20-30 хувиар энэ төслийн өртгийг багасгах санаа зааж өгье. Жишээлбэл, Оюутолгойн гүний уурхайд 5,200 ажилтан ажиллаж байна. Тендер зарлахаас өмнө Засгийн газар, хотын дарга "Оюу толгой" ХХК-ийн удирдлагуудтай нийлж байгаад энэ туршлагыг нь, боловсон хүчнийг нь, техникийг нь Улаанбаатар хотод авчраад саваа бэлдэх ёстой. Хамгийн өртөг өндөр зардал бол газар доогуур 19 километрийн нүхээ ухах ёстой. Түүний дараа тендерээ зарлавал эдийн засгийн үг өгөөж бараг 200 сая ам.доллар хэмнэх бололцоотой. Монгол залуучуудынхаа инженерийн мэдлэг туршлагыг Улаанбаатар хотдоо оруулж ирэх зайлшгүй шаардлага харагдаж байна. Гэтэл инженер бэлтгэнэ, боловсон хүчнээ бэлтгэнэ гээд дэмий зардал гаргаад байна. "Оюу толгой" ХХК бол маш олон жил хүний нөөцөө бэлдэж байгаа, дээрээс нь маш олон байгалийн баялгаа гадагшаа гаргаж байгаа. Нэг удаа ашиглах зайлшгүй шаардлагатай байна. Нийгмийн хариуцлагын хүрээнд Засгийн газар, УИХ-ын түвшинд оруулаад ирвэл маш их зардал, бараг 200-300 сая ам.долларын зардлыг хэмнэх боломжтой. Өмнөговь Оюутолгойд ажиллаж байгаа ажилчдаа Улаанбаатартаа нэг удаа ашиглаач ээ, дэмжээч ээ гэдэг саналтай байна" гэжээ.