2025 оны 1-р сарын 1-ний өдрөөс эхлэн хэрэгжиж эхэлсэн Малчны тухай хуульд 10-аас доошгүй жил тасралтгүй ажилласан малчны нэг хүүхдийг мал аж ахуйн тэжээл, бэлчээр судлалын чиглэлээр төрийн өмчийн их, дээд сургуульд үнэ төлбөргүй сургана гэж заасан. Уг заалт 2025-2026 оны хичээлийн жилд хэрэгжих аж. Энэ талаар Боловсролын сайд П.Наранбаяр "Малчны хуульд заасан дээрх асуудал хэрэгжинэ. Боловсролын зээлийн санд эх үүсвэр нь тусаад орж байгаа. Ирэх намар буюу 9-р сарын 1-нээс эхлээд мал аж ахуйн тэжээл, бэлчээр судлал чиглэлээр суралцах боломжоор хангагдана" гэлээ. 

Малчны тухай хуулийн хоёрдугаар бүлэг малчдын талаар төрөөс баримтлах бодлого хэсгийн 4.2.5.малчнаар 10-аас доошгүй жил тасралтгүй ажилласан малчны нэг хүүхдийг мал аж ахуй, тэжээл, бэлчээр судлалын чиглэлийн мэргэжлээр төрийн өмчийн дээд боловсролын сургалтын байгууллагад үнэ төлбөргүй суралцуулах гэж хуульчилсан.