"Цалинтай ээж" хөтөлбөрийн 50 мянган төгрөгийг 500 мянган төгрөг болгоно хэмээн УИХ-ын Д.Үүрийнтуяа гишүүн ярьсан нь олны анхаарлыг татаж байна. 

Харин энэ  сэдвээр Гэр бүл, хөдөлмөр, нийгмийн хамгааллын сайд Л.Энх-Амгалан байх сууриа илэрхийлэхдээ “Хөтөлбөрийг нь "цалинтай ээж" гэж нэрлэчхээд өгч байгаа тэтгэмж. Улсын хэмжээнд 170 мянга орчим ээж энэ тэтгэлгийг авдаг. Одоо Халамжийн тухай хуулийг УИХ-д өргөн барина. Бид халамжийн хөтөлбөрүүдээ эргэн харах шаардлагатай байна. Хүүхдийн мөнгө ч гэсэн халамж. Улсын хэмжээнд жилд 2.4 их наяд төгрөгийг халамжид зарцуулж байна. Үүний 1.7 их наяд нь хүүхдийн мөнгө. Бидний хувилбар бол гурван жилийн хугацаанд сар тутам 50 мянган төгрөг өгөх үү эсвэл 0-6 сар буюу хамгийн их зардал гардаг хүүхдийг нярай байх үед ээжид нь 100-150 мянган төгрөг өгөх үү гэдэг тооцоолол яригдаж байгаа. Түүнээс биш сэтгэлийн хөөрлөөр “Цалинтай ээжийн мөнгийг 500 мянган төгрөг болгоно” гэж болохгүй" гэлээ.