Засгийн газраас нутгийн өөрөө удирдах байгууллагад татвар, хураамж, зөвлөмж, төлбөр нэмэгдүүлэхгүй байх зөвлөмж хүргүүлсэн. Энэ дагуу нийслэл хотод автомашины татварыг гурав дахин нэмсэн асуудлыг нийслэл дахин авч хэлэлцэх ёстой гэлээ. Тодруулбал, ЗГХЭГ-ын дарга Н.Учрал "Орон нутаг өөрөө ИТХ-аараа тухайн нутаг дэвсгэрийн төлбөр, хураамжтай холбоотой асуудлыг шийдвэрлэдэг. Энэ төлбөр хураамжийг нэмэхгүй байх чиглэл хүргүүлсэн. Иймд нутгийн удирдлагын байгууллага Засгийн газрын тогтоол шийдвэрийг биелүүлж ажиллахад анхаарах хэрэгтэй. Цаашдаа Засгийн газрын зүгээс хууль, тогтоомж өргөн мэдүүлэхэд хууль дагуулж татвар, төлбөр, хураамж нэмж байгаа энэ байдлыг зогсоох ёстой гэдэг шийдвэр гарсан гэж ойлгож болно. Өнгөрсөн хугацаанд дулаан, цахилгааны үнэ нэмэгдсэн. Дулааны үнэ ирэх намар дахин нэмэгдэнэ гэдэг мэдээлэл гарч эхэлсэн. Эрчим хүчний зохицуулах хороо энэ шийдвэрээ эргэн хараад үүнийгээ хойшлуулах шийдвэр ав гэдэг шийдвэр гарсан гэж ойлгож болно. Засгийн газар чиглэл хүргүүлээд тус шийдвэрийг цуцлах боломжгүй юм. Харин ИТХ дахин авч хэлэлцэж хуралдах боломж байгаа. Хэрвээ Засгийн газраас өгсөн чиглэлийг хүлээн авч энэ асуудлаар хуралдахгүй тохиолдолд Засгийн газрын тогтоолыг танилцуулж, шахаж шаардаж ажиллана" гэлээ.