Гэр бүл, хөдөлмөр, нийгмийн хамгааллын сайд Л.Энх-Амгалан "Цагаан сараар шинийн 2, 3-ны бямба, нямд амраад даваа гарагаас ажил эхэлнэ. Хууль нь ийм юм" хэмээн мэдээлж байсан.

Үүний дараа иргэд 11-11 төвд гомдол санал гаргаснаар сайдын "хуулиа л дагах" шийдвэрийг эргэн харахад хүрсэн. Улмаар өнөөдөр /2025.02.26/-ийн засгийн газрын хуралдаанаар цагаан сарын амралтыг ирэх долоо хоногийн лхагва гарагийг дуустал үргэлжлэх тогтоол гарлаа. Өөрөөр хэлбэл, монголчууд могой жилийн сар шинээр гуравдугаар сарын 5 хүртэл амрахаар боллоо. 

Засгийн газрын хуралдааны дараа сайд Л.Энх-Амгалан "Төрийн байгууллагууд пүрэв гараг хүртэл амарна. Харин хувийн хэвшлийнхэнд пүрэв гараг хүртэл амрахыг уриалж байгаа юм. Засгийн газар амралтын өдрийг Хөдөлмөрийн хуулийн дагуу шилжүүлэх боломжгүй болчихсон. Энэ ондоо багтаж гурав хоногийн амралтаа нөхөж ажиллах зохицуулалт хийсэн. Ард иргэдийг бухимдуулж, цаг алдсандаа би уучлал хүсэх ёстой. Хууль батлагдаж амжаагүй учраас ийм зүйл болсон. Хаврын чуулганаар хуулийг өргөн барих болно. Дахин хүлцэл өчье" гээд "Тэнэг сайд, мулгуу сайд, орон гаран сайд гэж их л хусуулж байна даа" гэлээ.