Мөрдөн байцаах газрын дарга, Цагдаагийн сургуулийн тэнхмийн эрхлэгч асан, С.Зоригийн хэргийн мөрдөн байцаагчаар ажиллаж байсан хурандаа З.Төрмандахыг баривчилсан гэх мэдээлэл гараад байна. Эх сурвалжийн мэдээлснээр тэрбээр эмнэлэгт хэвтэн эмчлүүлж байгаа бөгөөд ажилчид нь болох дөрвөн хүнийг саатуулжээ. Харин З.Төрмандах өнөөдөр /2025.02.19/ эмнэлгийн машинаар хүргүүлж ирж, мэдүүлэг өгч байна. Түүний эрүүл мэндийн байдал сайнгүй байгаа аж. 

Өдгөө "MCS" компанийн хамгаалалтын албаны дарга гэх ажлыг эрхэлдэг хурандаа З.Төрмандахыг Эрүүгийн хуулийн 19.11 дүгээр зүйл, 21.13 дугаар зүйл зэрэг үндэслэлээр шалгаж байгаа аж. 

• 19.11 дүгээр зүйл.Төрийн нууцыг хууль бусаар олж авах 1.Төрийн нууцад хамаарах мэдээ, баримт, эд зүйлсийг хулгайлсан, цуглуулсан, хадгалсан нь эх орноосоо урвах, тагнуул хийх гэмт хэргийн шинжгүй бол зургаан сараас гурван жил хүртэл хугацаагаар зорчих эрхийг хязгаарлах, эсхүл зургаан сараас гурван жил хүртэл хугацаагаар хорих ял шийтгэнэ.
• 21.13 дугаар зүйл.Гүйцэтгэх ажлын тухай хууль зөрчих 2.Гүйцэтгэх ажил явуулах эрхгүй этгээд гүйцэтгэх ажил явуулсан, эсхүл гүйцэтгэх ажлын тусгай техник олж авсан, ашигласан, борлуулсан бол хоёр мянга долоон зуун нэгжээс арван дөрвөн мянган нэгжтэй тэнцэх хэмжээний төгрөгөөр торгох, эсхүл зургаан сараас гурван жил хүртэл хугацаагаар хорих ял шийтгэнэ.