Эрүүл мэндийн сайд Т.Мөнхсайхан орон нутагт ажиллаж буй. Хөвсгөл аймагт ажиллахдаа Нэгдсэн эмнэлэгт шаардлагатай цахилгаан дерматоми тархины мэс заслын суурь багаж, эмгэг судлалын лабораторийн тоног төхөөрөмж, хэвлийн хөндийн мэс заслын тоног төхөөрөмж, ортопед ор, шүдний сувгийн эмчилгээний сувгийн урт хэмжигч аппарат, шүдний дэлгэмэл рентген аппарат, ургийн гажиг илрүүлэх ЭХО, зоонозын өвчин судлалын төвд шаардлагатай компьютер зэргийг шийдвэрлэжээ. 

Мөн Ханх суманд төсөл, хөтөлбөрийн хөрөнгө оруулалтын хүрээнд ЭМТ-ийн барилга, эмнэлгийн тусламж үйлчилгээ үзүүлэх бага оврын усан завьтай болгохоор болсон байна. 

Дэлхийн банкны санхүүжилттэй 1,4 тэрбум төгрөгийн төсөвт өртөг бүхий 64 зүслэгт СТ-г Хөвсгөл аймгийн нэгдсэн эмнэлэгт суурилуулж бүрэн ашиглалтад орууллаа. СТ-г Дорнод, Сүхбаатар аймгуудад ашиглалтад оруулсан бөгөөд Хөвсгөл аймаг ийнхүү гурав дахь аймаг болж байна. Ингэснээр контрастай шинжилгээ хийх боломж бүрдэж, “Төвлөрлийг сааруулах” бодлогыг хэрэгжүүлэх чухал ач холбогдолтой хөрөнгө оруулалт боллоо.