Монголчууд бурхан болоочийн араас маань мэгзэм уншиж, сайн төрлийг хурдан олох болтугай хэмээн буян үйл хийдэг уламжлалтай. Гэвч өдгөө энэ нь улирч бүдгэрчээ. Харин үүний оронд талийгаачдаа өртэй, мөрийтэй тоглоомчин байсан, архичин байсан, ял шийтгэл эдэлж байсан гэх мэтээр "гоочлох" болсон. Хамгийн сүүлийн жишээ. Өнгөрсөн сарын 23-24-нд шилжих шөнө гэр бүлээрээ угаартаж нас барсан иргэдийн хувийн эмзэг мэдээллийг хайр найргүй цацав. Хорооноос гэр өгсөн, зуух өгсөн, хамтран амьдрагчтай, архины хамааралтай бүр цор ганцаараа үлдсэн учраа мэдэхгүй яваа хүүг нь хүртэл "Урьд өмнө ял шийтгэл эдэлж байсан" гэх мэдээлэл түгээв. 

Хэдийгээр ХЗДХ-ийн сайд О.Алтангэрэл яаран гарч ирж мэдээлэл хийж, ЦЕГ-аас манай мэдээлэл биш хэмээн мэдэгдсэн ч тухайн мэдээллийн "хор" арилахгүй. Яамнаас мэдээллийг задруулсан хэргийг илрүүлнэ гэж байгаа ч үлдсэн ганц хүү, талийгаач эмэгтэйн ах дүүс, садан төрлүүдэд илрүүлснээр ямар хэрэгтэй байх вэ. Хэдэн хүүхдээ өсгөх гэж, дулаан бүлээн байлгах гэж эрвийж явсан нэгэн ээжийн бүхий л амьдралыг гутаан доромжилчхоод сүржин мэдэгдэл, мэдээллээрээ юуг засч залруулах юм бол. Хүүг хамгаалалтад авч, хүсэл шаардлагыг нь сонсоно гэнэ. Хамгаалж чадаагүй харлуулчхаад, бяцхан дүүгийнхээ үсэглэлийн баярыг тэмдэглэж өгөх хүслийг нь үгүй хийчхээд. 

Зураг хөрөг, нас хүйстэй нь зарласан уг мэдээллийг харахад иргэдийн харъяа бүхий хорооноос гарсан байх магадлалтай. Хаанаас ч гарсан байсан улстөржүүлэх зорилгоор ашиглаж байгаа нь тодорхой үйлдэл юм. Хэн нэгнээ унагах, харлуулах арга технологи нь хөөрхий ядарсан иргэд. Монголын төр, монголын улс төрийн хүчнүүд, улс төрийн пиарчид хэдий болтол ядарсан ард иргэдээрээ туг тахиж, өөд бологсдоо ч хүн ёсоор үдэж болохгүй бохир технолгио ашиглах бол. Муухай төр... 

А.Азжаргал