Д.Сүхбаатар жанжны үр хүүхэд, төрөл төрөгсдөд хүндэтгэл үзүүллээ
Монгол цэргийн суут жанжин, нэрт удирдагч, ардын хувьсгалын анхны долоогийн нэг Дамдины Сүхбаатарын мэндэлсний 132 жилийн ойн өдөр өнөөдөр /2025.02.02/ тохиож буй юм. 
Энэ түүхэн өдрийг тохиолдуулан Монгол Ардын Намын дарга, Ерөнхий сайд Л.Оюун-Эрдэнэ, Монгол Ардын Намын Ерөнхий Нарийн Бичгийн дарга Я.Содбаатар нар жанжин Д.Сүхбаатарын үр хүүхэд, төрөл төрөгсдийн төлөөллийг хүлээн авч уулзаж, хүндэтгэл үзүүллээ.
МАН-ын дарга, Ерөнхий сайд Л.Оюун-Эрдэнэ тусгаар тогтнолын үнэ цэнэ, үүргийг олон нийтэд таниулах, түүхэндээ хүндэтгэлтэй хандах, түүхийг гуйвуулсан мэдээ, мэдээллийг залруулахад жанжны гэр бүлтэй хамтран ажиллах хүсэлтэй байгаагаа илэрхийлж, тэднийг жанжны талаарх түүх, дурсамжийг хойч үедээ ярьж, хэлж, бичиж үлдээхэд онцгой ач холбогдол өгч ажиллана гэдэгт итгэж байна гэв.
Мөн Ерөнхий Нарийн Бичгийн дарга Я.Содбаатар Д.Сүхбаатар жанжны мэндэлсэн энэ түүхт өдөрт зориулан 21 аймаг, 9 дүүргийн Монгол Ардын намын хорооны хийж, хэрэгжүүлж буй ажлыг танилцуулав.
Жанжны гуч охин С.Уянга өндөр өвөөгийн минь тэмцэж олж ирсэн тусгаар тогтнол үеийн үед батжин бэхжихэд бид өөрсдийн чадах хувь нэмрээ оруулна гэдгээ илэрхийлсэн бол гэр бүлийнх нь төлөөлөл Л.Заяа жанжны үр хүүхэд, төрөл төрөгсдийн дунд хууль, эрх зүй, гадаад харилцаа зэрэг олон салбарт мэргэшсэн, туршлагатай боловсон хүчин олон байгааг онцлоод, тэднийг “Анхны долоо сан”-гийн үйл ажиллагаанд идэвхтэй татан оролцуулна гэлээ.
Мөн уулзалтын үеэр жанжны гэр бүлийн гишүүд болон Намын даргаар ажиллаж байсан Б.Даш-Ёндон, Н.Энхбаяр нар тусгаар тогтнолын үнэ цэнийг хойч үедээ гүн бат ойлгуулж, ардын хувьсгалын анхны долоогийн үйл хэргийг үнэн зөвөөр түгээн дэлгэрүүлэх үйлсэд амжилт хүсэж, “Анхны долоо сан”-д хандив өргөсөн юм.