УИХ-ын гишүүн, Гэр бүл, хөдөлмөр, нийгмийн хамгааллын сайд Л.Энх-Амгалан Сар шинийн баяраар бүх нийтээрээ арван хоног амардаг байх төсөл боловсруулж буйгаа өмнө нь мэдээлсэн.

Тэрбээр өнөөдрийн Засгийн газрын хуралдаанд наадам, цагаан сарын амралтын талаар  танилцуулга хийсэн бөгөөд энэ тухайгаа “Өнөөдөр цагаан сар, наадмаар амрах өдрүүдийн талаарх зохицуулалт хийлээ. Яагаад асуудал үүсч байгаа юм бэ гэхээр монгол улс есөн баяраар 16 өдөр амардаг хуулийн зохицуулалттай. Шинийн 1, 2, 3, үндэсний баяр наадмаар 10-15-ны өдрүүдэд амардаг. Иргэдээс олон санал гарч байгаа учраас одоо энэ шинийн 1, 2, 3, наадмын хуулиар амрах өдрүүд хагас, бүтэн сайн өдөр тохиовол нөхөж амардаг больё гэсэн ийм зохицуулалт ярьсан.

Энэ зохицуулалтуудыг хийгээд дээрээс нь ид хүйтнээр ард иргэдээ зайнаас ажиллуулдаг болох, ид хүйтний амралтыг хэрхэн зохицуулах хүүхдийн амралттай хэрхэн уялдуулах, ид ханиадны үетэй хэрхэн яаж уялдуулах вэ зэрэг шинэ зохицуулалтуудыг нэмэх ийм чиглэл өгсөн байгаа. Өнөөдөр засгийн газрын тогтоол бол гараагүй шүү. Зөвхөн үүрэг, чиглэл л өгсөн. Тэгэхээр энэ жилийн цагаан сараар 5 хоног амрах юм байна гэж бодоод яваад өгч болохгүй шүү. Үүнд, Хөдөлмөрийн болон Нийтээр тэмдэглэх баярын болон тэмдэглэлт өдрүүдийн тухай хоёр хуульд өөрчлөлт орох учраас Засгийн газраас зөвшөөрөл өгвөл УИХ-д өргөн бариад УИХ баталсны дараа энэ зохицуулалт эхэлнэ гэсэн үг.  УИХ хаврын чуулганаар үүнийг баталбал наадам болон сар шинийн баяраар энэ зохицуулалт хэрэгжиж эхэлнэ. Тэгвэл цагаан сар бямба, нямд таарвал 4-6 хоног, наадмын өдрүүдэд таарвал 8 хоног амрах зохицуулалттай болно гэсэн үг" гэлээ.