Өвөл, хаврын морин уралдааныг сэргээж өв соёлоо хамгаална гэх шаардлагаар уяачид Төв талбайд морьтойгоо жагссан. Тодруулбал, хаврын морин уралдааны "Дүнжингарав" наадмыг сэргээлгэхээр Монголын морин спорт уяачдын холбоо санал хүсэлтээ Засгийн газар болон холбогдох албаныханд өгсөн байна. Энэ нэг талаас өв уламжлал сэргээх уяачдын чин хүсэл байгаа бол нөгөө талаас хахир хатуу цагт унаач хүүхдийн эрүүл мэнд, аюулгүй байдлын эсрэг үйл ажиллагаа болно хэмээх эсэргүүцэл тулгарч буй. Тэгвэл уг асуудал маргааш буюу лхагва гарагийн Засгийн газрын ээлжит хуралдаанаар хэлэлцэж, шийдэлд хүрэх бололтой. 

Сануулахад, хаврын морин уралдааныг 2019 оноос хойш хориглосон бөгөөд одоогийн УИХ-ын гишүүн Х.Баасанжаргал тухайн үед "Дүнжингарав" хаврын уралдааныг зохион байгуулж уралдаанч хүүхдүүдийн эрхийг ноцтой зөрчиж байна гэж Засгийн Газрыг шүүхэд өгч, тус асуудлын өмгөөлөгчөөр Дээд Шүүхийн эцсийн шийдвэр гартал ажилласан бөгөөд үүгээрээ Олон улсын шилдэг про боно хуульчийн шагнал хүртэл хүртсэн анхны монгол эмэгтэй өмгөөлөгч, хуульч болжээ.