2024 оны есдүгээр сард Засгийн газрын хуралдаанаар авлигын хэрэгт холбогдсон ЭМДЕГ-ын дарга Л.Бямбасүрэнг үүрэгт ажлаас нь чөлөөлсөн.  Тэгвэл түүний оронд Эрүүл мэндийн сайд, дэд сайдаар ажиллаж байсан С.Энхболдыг томилжээ. 

Хэргийг сануулахад, Л.Бямбасүрэн нь ЭМДЕГ-ын даргаар ажиллаж байхдаа хувийн болон улсын эмнэлгээс даатгалаар олгох ёстой мөнгөнөөс хувь нэхэж, өвчтөний тоогоор олгох ёстой мөнгийг хуурамчаар ихэсгэн, хясан боогдуулах замаар дөрвөн удаагийн үйлдлээр хувь авч байсныг илрүүлж, 2024 оны есдүгээр сарын 17-ны өдөр үйлдэл дээр нь барьж, хорьсон. Авлигатай тэмцэх газраас /2024.11.12/ Л.Бямбасүрэн нарын 11 хүнд холбогдох хэргийг шалгаж дууссан талаар мэдээлсэн бол  прокурорын байгууллагаас хэрэгт яллах дүгнэлт үйлдэн, нийслэлийн Хан-Уул дүүргийн Эрүүгийн хэргийн анхан шатны шүүхэд шилжүүлээд буй. Ингэхдээ, Эрүүл мэндийн даатгалын ерөнхий газрын албан тушаалтнууд бусдын ашиг сонирхлын үүднээс албаны чиг үүргээ хэрэгжүүлсний хариуд хахууль авсан, мөнгө угаасан, хахууль өгсөн хэрэгт Эрүүгийн хуулийн 22.4 дүгээр зүйлийн 1, 2 /Нийтийн албан тушаалтан хахууль авах/, 22.5 дугаар зүйлийн 1 /Хахууль өгөх/-т зааснаар яллах дүгнэлт үйлджээ.