Солонгосын алдарт жүжигчин Чон Жи Хён (Jun Ji-hyun) “Tempest” нэртэй шинэ драмд тоглосны дараа Хятадын үзэгчдийн эсэргүүцэлтэй тулгарч, зарим томоохон брэндийн сурталчилгааны гэрээ эргэлзээтэй болоод байна.

Энэхүү кино нь Солонгосын тусгай албаныхан, улс төрчид алан хядагчдын эсрэг хэрхэн ажиллаж байгааг харуулсан цуврал бүтээл.

Маргааны шалтгаан нь киноны нэг хэсэгт гарсан “Why does China prefer war?” гэх өгүүлбэр бөгөөд энэ нь Хятадыг дайныг өөгшүүлдэг мэтээр ойлгогдож, интернэт хэрэглэгчдийн дургүйцлийг төрүүлжээ. Мөн цаашлаад улс төрийн нэгэн уулзалт болж байгаа өрөөний хивс нь улаан өнгөтэй, дээрээ таван хошуутай байгаа нь БНХАУ-ын төрийн далбааг дүрсэлсэн гэж шүүмжлээд буй.

Үүний дараагаар тансаг зэрэглэлийн зарим брэнд Хятадын сошиал хуудсаасаа Жүн Жи-Хёны сурталчилгааг устгаж, зарим компани сурталчилгааны үйл ажиллагаагаа хойшлуулсан байна.

Вьетнамын VNExpress сонинд мэдээлснээр, Луи Виттон (Louis Vuitton), Пиже (Piaget), Ла Мэр (La Mer) зэрэг брэндүүд түүнтэй холбоотой контентоо устгасан бол Хятадын робот тоос сорогч үйлдвэрлэгч Ecovacs нэг жилийн дараа Жүн Жи-Хёныг оролцуулсан сурталчилгаагаа цуцалжээ. Энэ нь хэдэн сая ам.долларын алдагдал учруулж болзошгүй гэж шинжээчид үзэж байна.

Гэсэн ч жүжигчний агентлаг мэдээллийг үгүйсгэн, “сурталчилгааны гэрээ драмаас болж цуцлагдаагүй, харин орон нутгийн нөхцөл байдал, хуваарийн өөрчлөлтөөс шалтгаалан зураг авалт хойшлогдсон” гэж мэдэгдэв.

Маргаан үргэлжилж буй энэ үед Чон Жи Хёны нэр хүнд, Хятадын зах зээл дэх байр суурь цаашид хэрхэн өөрчлөгдөх нь олны анхаарлын төвд байна.