Домогт Битлз хамтлагийн дуучин Жон Леннон болон түүний 2 дахь гэргий Иоко Оно нарын хүү Шон Оно Ленон Монголд найз бүсгүй Кемп Мультай аялсан билээ. Тэрбээр аяллынхаа туршид өдөр тутам үзэж харсан зүйлсээ гэрэл зургийн дуранд буулгаж X хаягтаа нийтлэн сонирхуулж байсан юм.

Шон Оно Леннон нь аавынхаа мэргэжлийг өвөлж хөгжимчин, дуучин, продюсер хийдэг. Аав, ээжийнхээ “War is over” хэмээх дуунаас сэдэвлэж бүтээсэн ижил нэрт бүтээлээрээ өнгөрсөн жил  “шилдэг богино хэмжээний анимейшн” төрлөөр Оскарт нэр дэвшиж ялж байв.

Түүний хувьд Монголын хөдөө нутагт морь, тэмээ унаж, гэрт хоноглон шарын шашин, бөө мөргөл, сур харваа гээд уламжлалт соёлтой танилцаж говь цөлд палентелогичтой хамт үлэг гүрвэлийн яс хүртэл малтаж үзжээ.

Хөл хөдөлгөөн ихтэй том хотын амьдралыг огтхон ч санахгүй байна гэсэн тэрбээр ийнхүү 10 хоногийн аяллаа өндөрлүүлж нутаг буцахаар болсон байна.