Дэлхий даяар алдаршсан Netflix-ийн “Squid Game” цуврал Америкийн хувилбараар дахин төрөхөөр боллоо. “Squid Game: America” нэртэй спин-офф төслийг Netflix зарласан бөгөөд Лос-Анжелес хотод зураг авалт хийхээр төлөвлөж байгаа талаар Gizchina мэдээллээ.

Тус бүтээлд алдарт найруулагч David Fincher, зохиолч Dennis Kelly нар ажиллах бөгөөд анхны хувилбарынх шиг ядуурал, өр зээлийн дарамтад орсон хүмүүс амьд үлдэхийн төлөө аюулт тоглоомд өрсөлдөх байдлаар өрнөх юм. Гэхдээ Америкийн соёл, нийгмийн бодит байдлыг тусгаж, шинэ тоглоомууд, шинэ дүрүүд нэмэгдэхээр байгаа нь үзэгчдийн анхаарлыг татаж байна.

Цувралын 3-р улиралын төгсгөлийн ангид жүжигчин Cate Blanchett “Америк элсүүлэгч” дүрээр гарч ирсэн нь дараагийн ангитай холбогдох дохио болсон гэж үзэгчид таамаглаж байгаа юм.

“Squid Game: America” нь анхны хувилбар шиг нийгмийн ялгаа, хүний шунал, амьд үлдэх зөн совинг бодитоор харуулж, хүчтэй триллер байдлаар хийгдэх хүлээлттэй байгаа бөгөөд дэлхийн үзэгчдийн сонирхлыг дахин татах нь гарцаагүй гэж салбарынхан онцолж байна.