Алдарт Blackpink хамтлагийн гишүүн "Jennie"-гийн нэр хүндэд халдсан хэрэгтэй холбоотойгоор, өөрийгөө түүний төрсөн аав хэмээн худал мэдээлэл олон нийтэд тараасан этгээд “А”-д холбогдуулан гаргасан гомдлыг шүүх эцэслэн шийдвэрлэлээ.

Сөүл дэх хуулийн байгууллагын мэдээлснээр, уг этгээд нь 2024 оны сүүлчээс эхлэн олон нийтийн сүлжээгээр дамжуулан “Jennie бол миний охин” гэх зохиомол, нотлогдоогүй мэдээллийг тарааж, олны анхаарал татаж, хувь хүний нэр төр, эрх ашгийг ноцтойгоор хөндсөн үйлдэл хийжээ.

Jennie-гийн талаас тухайн этгээдийн эсрэг “Худал мэдээлэл тараасан, нэр хүндэд халдсан” үндэслэлээр шүүхэд гомдол гаргасан бөгөөд шүүхээс “А”-гийн үйлдлийг гүтгэлэгт тооцож, хуулийн хариуцлага хүлээлгэх шийдвэр гаргасан байна.

Тухайн этгээд өмнө нь ч ижил төстэй хэлбэрээр олон нийтэд өөрийгөө алдартай хүмүүсийн хамаатан, ойр дотны хүн хэмээн танилцуулж байсан тухай мэдээлэл байгаа бөгөөд шүүхээс түүнийг дахин ийм төрлийн мэдээлэл тараахгүй байх хориг арга хэмжээ авч, торгууль ногдуулсан байна.

Jennie болон түүний агентлаг ODD ATELIER уг хэрэгт холбогдуулан хэвлэлийн мэдэгдэл гаргаж, “Худал мэдээлэл, хуурамч хамаарлыг тараах замаар уран бүтээлчийн нэр хүндэд халдах оролдлого дахин гарвал хуулийн дагуу шийдвэрлэнэ” гэдгээ мэдэгдээд байгаа юм.