Сүүлийн нэг жилийн хугацаанд тик токын одуудаас эхлээд BLACKPINK хамтлагийн Лиса, Rosе тэргүүтэй алдартнууд Labubu хэмээх өвөрмөц хэлбэр дүрстэй тоглоомыг цүнх болон түлхүүрийн оосортоо аксесуар болгон хэрэглэж, загварын ертөнцөд шинэ чиг хандлага гаргаж ирлээ.

Гаднаасаа чухам гоо зүйн хувьд этгээд хачин харагдаж буй Labubu-ийн талаарх дэлгэрэнгүй мэдээллийг хүргэж байна.

Labubu гэж хэн бэ?

Уг тоглоомыг анх 2015 онд Касинг Лунг хэмээх уран бүтээлч “The Monsters” цувралынхаа хүрээнд танилцуулж байжээ. Харин өнгөрсөн онд BLACKPINK хамтлагийн Лиса Instagram хуудсаараа дамжуулан өөрийн Labubu тоглоомынхоо цуглуулгыг шүтэн бишрэгчидтэйгээ хуваалцсанаар тус тоглоом нь “Pop Mart” хэмээх Хятадын тоглоомын компанийн хамгийн эрэлттэй коллекцийн нэг болж хувирсан байна.

Labubu нь “The Monsters” гэх овгийн нэг гишүүн бөгөөд өөртэй нь төстэй, онцлог дүрүүдтэй хамт амьдардаг. Үүнд:

• Tycoco – Labubu-ийн найз залуу

• Zimomo – овгийн ахлагч

• Spooky, Yaya, Mokoko зэрэг олон дүрүүд багтдаг.

Labubu тоглоомын хувьд нийт 300 гаруй төрөлтэй хэдий ч хязгаарлагдмал тоогоор худалдаалагддаг учир маш хурдан зарагдаж дуусдаг билээ. Цуглуулагчид эдгээр дүрүүдийг олж авах, бүрэн цуглуулахын төлөө тулд зарим ховор хувилбарыг нь хэдэн зуун доллароор худалдан авч байгаа аж.

Түүнчлэн Rihanna, Dua Lipa, Kim Kardashian зэрэг дэлхийн супер одууд Labubu-г цүнхэндээ зүүж яваа зураг олон нийтийн сүлжээнд түгжээ.

2024 оны Louis Vuitton-ийн эрэгтэй загварын шоунд Labubu тусгай зочноор оролцсон нь түүнийг зүгээр нэг хүүхдийн тоглоом бус харин поп соёл, загварын салбарын элемент болсныг илтгэнэ.