Хоёр улсын батлан хамгаалах салбар хоорондын хамтын ажиллагааг бэхжүүлэх, өргөжүүлэх зорилго бүхий Катар Улсын Зэвсэгт хүчинтэй хамтарсан 10 дахь удаагийн “Шийдэмгий шийдвэр” сургууль амжилттай болж өндөрлөлөө. 

20 хоногийн хугацаанд үргэлжилсэн сургуульд Катар Улсын Зэвсэгт хүчнээс 450 (сонсогч 260), Монгол Улсаас Зэвсэгт хүчний 150 болон 311 дүгээр ангийн 170 гаруй цэргийн алба хаагч оролцсон юм.

Хамтарсан сургуулиар Катар Улсын “Ахмед Бин Мохаммедын” цэргийн коллежийн 4-р дамжааны сонсогч нар нь салаа, тасгийн байлдааны боломжийг тодорхойлох, аяны толгойн хаалтад томилогдсон салааны ажиллагааг төлөвлөн удирдах, дайрах, туршуул үйлдэх, хорлон сүйтгэх, эргүүлийн бүлгийг томилон ажиллуулах, байлдан тагнах, хот дотор байлдааны ажиллагаа төлөвлөн зохион байгуулах зэрэг ажиллагаанд өөр өөр цагийн байдлууд дээр өөрсдийн цэргийн хэргийн мэдлэг, дадлага чадвараа нэмэгдүүлж, онолоор судалж мэдсэн мэдлэгээ газар орон дээр бататгасан юм. 

Хаалтын үйл ажиллагааны үеэр Монгол Улсын Зэвсэгт хүчний ТХЦ-ийн командлагч бригадын генерал Б.Баатар хэлсэн үгэндээ хоёр орны дипломат харилцаа, тэр дундаа батлан хамгаалах салбар хоорондын хамтын ажиллагааны бэлэг тэмдэг болсон 10 дахь удаагийн “Шийдэмгий шийдвэр” сургууль амжилттай болж өндөрлөсөнд баяртай байгаагаа онцлоод ирээдүйд офицер болохоор бэлтгэгдэж буй “Ахмед Бин Мохамед” цэргийн сургуулийн сонсогчдод тус сургуулиар олж авсан цэргийн хэргийн мэдлэг, ур чадвараа улам хөгжүүлж, даян дэлхийн энх тайвны төлөө харамгүй зориулна гэдэгт эргэлзэхгүй байгаагаа илэрхийлэв.