БНХАУ Тайванийн эрэг орчимд хоёр дахь өдрөө цэргийн сургуулилт хийж байна. Сургуулилтын үеэр Хятадын флотын хөлөг онгоцууд, бөмбөгдөгч, сөнөөгч нисэх онгоцууд усан болон агаарын хилийг чөлөөтэй нэвтэрч байгаа юм байна.

Тайвань улс хэдэн сарын өмнөөс БНХАУ-ын хил зөрчсөн үйлдлүүдэд мониторинг хийж, нээлттэй зарладаг болсон. Сургуулилтын хоёр өдрийнхийг ч мөн зарласан байна. Түүнд өгүүлснээр, бямба гарагт 45 нисэх онгоц албан бус агаарын хилийг зөрчсөн бол ням гарагт 70 нисэх онгоц, 11 хөлөг онгоц агаарын болон усан хилийг нь зөрчжээ.

АНУ БНХАУ-ын энэ алхмыг хурцаар шүүмжилсэн ч мэдэгдэл нь бүрхэг байсан талаар хэвлэлүүд мэдээлж байна. БНХАУ-ын удирдагч Ши Жиньпиний мэдэгдэл харин “Тайванийг авах төлөвлөгөө ажил хэрэг болох ёстой” гэсэн маш товч, тодорхой байв.

Тайванийн эргийн хамгаалалтын хөлөг онгоцууд хил зөрчсөн хөлөг онгоцонд анхааруулга өгч, буцахыг шаардаж буй видео бичлэг олон нийтэд таржээ.