ОХУ-ын нислэгийг удирдах газар өнөөдрөөс (III,06) эхлэн гадаадын улс орнууд руу нэг ч нислэг хийхгүй байхыг авиа компаниуддаа зөвлөжээ. Онгоцыг саатуулах, барьцаалах магадлал асар өндөр болсон учир ийнхүү зөвлөсөн байна. 

Тухайлбал, өчигдөр Египетээс ОХУ руу нисэх ёстой байсан ОХУ-ын иргэний агаарын тээврийн “Уральские авиалинии” компанийн онгоцыг Египетийн Шарм эш Шейх хотод саатуулжээ. Компани уг онгоцыг лизингээр эзэмшиж байсан бөгөөд лизинг олгогчийн зүгээс өргөдөл гаргасан тул Европын нислэгийг удирдах газар агаарын зам ашиглах зөвшөөрөл өгөлгүй ийнхүү саатуулсан аж. Уг онгоц Кипрээр дайрч нисэх ёстой байж. Эргэн төлөлтийн хувьд ямар ч асуудалгүй, зүгээр л лизинг олгогч онгоцоо буцааж авах хүсэлт гаргаснаар ийм асуудал үүсжээ. Геополитикийн нөхцөл байдалтай холбоотойгоор ОХУ-ын авиа компаниудын үйл ажиллагаа хумигдаж байгаагийн нэг жишээ энэ боллоо. “Уральские авиалинии” компани өмнө нь энэ сарын 26-ныг хүртэл Арабын нэгдсэн эмират, Армен, Азербайжан, Израиль руу хийх нислэгээ цуцлаад байсан юм.