АНУ-ын Нью Йорк хотын Бронкс дүүрэгт  өнгөрсөн шөнө орон сууцны барилга шатаж 19 хүний амь нас хохирсон харамсалтай хэрэг болсон билээ. Хотын Гал унтраах газрын дарга Даниэль Найгро энэхүү галын шалтгааныг олон нийтэд танилцуулжээ. Түүний хэлснээр, оршин суугчдын нэг нь өрөөндөө цахилгаан халаагуурыг стандарт бусаар ашиглаж байснаас болж гал гарсан гэнэ. “Гэрийн эзэд явахдаа азгүй тохиолдлоор хаалгаа хаахаа мартсанаас гал бусад айлуудад тархсан” гэж тэрээр мэдэгджээ.   

Дээр хэлсэнчлэн, галын улмаас 19 хүний амь хохирсны ес нь хүүхэд байна. Мөн 63 хүн түлэгдэж, угаартжээ. Тэдний 32-ынх нь биеийн байдал тогтворгүй, маш хүнд байна. Нью Йоркт сүүлийн 30 жилд ийм их хохиролтой гал түймэр гарч байгаагүй аж.