Мосвад коронавируст цар тахлын халдвар эрс нэмэгдсэнтэй холбоотойгоор өнөөдрөөс хязгаарлалтуудыг үе шаттайгаар авч хэрэгжүүлэхээр болсон байна. Хотын мэр Сергей Собянины тушаалаар гаргаж буй уг хязгаарлалтуудын зарим нь өнөөдрөөс хэрэгжиж эхэлсэн бол зарим нь лхагва гарагаас хэрэгжих гэнэ.

Тухайлбал, өнөөдрөөс эхлээд архаг хууч өвчтэй 60-аас дээш насны иргэдийг гэрээсээ гарахыг хориглож, тусгаарлалтын дэглэмд оруулжээ. Энэ журам дөрвөн сар буюу аравдугаар сарын 25-наас 2022 оны хоёрдугаар сарын 25 хүртэл дөрвөн сарын турш хэрэгжих гэнэ.  Гэхдээ сүүлийн хагас жилд энэ өвчнөөр давтаж өвдсөн хүмүүст энэ шийдвэр хамаарахгүй ажээ.     

С.Собянины шийдвэрт мөн ажил олгогчдод хандаж, ажлын байранд нэг зэрэг байх хүмүүсийнхээ тоог хамгийн багадаа 30 хувиар бууруулахыг үүрэгджээ.

-Өнөөдөр буюу даваа гаригаас Самара, Нижегород, Новгород, Воронеж, Курск, Перм зэрэг зургаан мужид ажлын бус долоо хоног эхэлсэн.

-Энэ сарын 28-наас ирэх сарын 7 хүртэл Москва хотод тусгаарлалтын дэглэм тогтооно. Дэлгүүр, ресторан болон олон нийтийн үйлчилгээний байгууллагууд ажиллахгүй, зарим нь 50 хувийн дүүргэлттэй ажиллана. 

ОХУ-д халдварын тохиолдол огцом нэмэгдэж байгаа бөгөөд өнгөрсөн есдүгээр сарын сүүлээс шинэ давлагаа эхэлсэн гэж үзэж байгаа юм.