Польшийн Үндсэн хуулийн цэц энэ сарын 7-ны өдөр Польшийн өөрийн хууль тогтоомж нь Европын холбооны нийтээр дагаж мөрдөх хуулиас давуу эрхтэй гэсэн агуулгатай дүгнэлт гаргасан нь Брюссельд маш том шуугианыг дэгдээгээд байна. Европын холбооны мяндагтнууд Польшийн энэ шийдвэрийг том толгойлсон, холбооны дүрмийг уландаа гишгэсэн үйлдэл учир даруулгатай болгохын тулд боломжит бүх аргыг хэрэглэнэ гэсэн байр суурийг нэг, нэгнээсээ өрсөн илэрхийлцгээв. Тэд Польшийн үндсэн хуулийн цэцийн шийдвэр нь Польшийг Европын холбооноос гаргах буюу Польэкзитийг эхлүүлсэн хэрэг хэмээн хүлээн авч байна.

Европарламентын спикер Давид Сассоли “Польшийн Үндсэн хуулийн цэцийн шийдвэр нь зүгээр өнгөрөөх хэрэг биш, Европын холбоонд хуулийн нэгдсэн нэг стандарт мөрдөгддөг бөгөөд энэ нь холбооны хамгийн чухал, бүгд биелүүлэх ёстой үндсэн дүрмийн нэг юм” гэж твиттер хуудастаа бичжээ. Еврокомиссын тэргүүн Урсула фон дер Ляйен бүр ч хурц мэдэгдэл хийж, “Польшийг хамжааргатай болгохын тулд боломжтой бүх механизмыг ашиглана” гэсэн байна. Механизм гэдэг нь Европын холбооны дүрмийн долдугаар зүйлийг хэрэгжүүлэхийг хэлж байгаа бөгөөд энэ зүйлд гишүүн улс нь холбооны нийтлэг эрх ашигт харшлах үйлдэл хийвэл санхүүгийн тусламжуудыг зогсоох, Европын зөвлөл дэх саналын эрхийг нь хасах гэх зэрэг арга хэмжээнүүд багтдаг аж. Польшийн хувьд энэ асуудалд яриа хариу өгөх нь одоогоор тодорхойгүй. Ямартай ч улс төрийн хүрээндээ хуваагдмал байр суурьтай байгаа талаар орон нутгийн хэвлэлүүдэд мэдээлж байна.