АНУ-ын Зэвсэгт хүчний жанжин штабын дарга, генерал Марк Милли “Фокс ньюс” телевизэд өгсөн ярилцлагадаа талибууд онц эсэргүүцэлгүйгээр засгийн эрхэнд гарсны шалтгааныг өөрийнхөө бодлоор тайлбарлажээ. Түүний хэлснээр, иргэний нийгмийн засгийн газар хэдий ардчилсан нэртэй ч авлигад асар их идэгдсэн байсан нь үүнд хамгийн ихээр нөлөөлсөн гэнэ. Өөрөөр хэлбэл, иргэд нь Засгийн газартаа итгэхээ больсон байжээ.

“Засгийн газар нь иргэдийнхээ нүдэнд Засгийн газар гэж хүлээн зөвшөөрөгдөхөө больсон. Эцэстээ юу болохыг бүгд харлаа шүү дээ. Эрх баригчид, элит хэсэг сүүлдээ бүгд гарч явцгаалаа” гэж тэрээр хэлсэн байна.

Үнэхээр ч АНУ-ын цэрэг орж ирж, талибуудын засаглалаас чөлөөлөөд 20 жил болсон боловчиг эгэл жирийн афганчуудын амьдрал төдий л сайжраагүй юм. Энэ хооронд донор орнуудаас багагүй тусламж авсан ч мөнгө нь шат, шатандаа идэгдсээр иргэдэд өчүүхэн хэсэг нь хүрдэг байжээ. Сүүлдээ улстөрчид нь иргэдийнхээ нүдэнд улстөрч, төрийн тшмэд шиг биш авлигач хулгайч шиг харагдах болсон байна. Тэрээр “Афганистаны Засгийн газрыг санаснаас эрт нурж унасан” гэж дүгнэснээс үзэхүл Вашингтон одоо болоод байгаа үйл явцын өрнөлийг урьдчилан харж байж. Гэхдээ төсөөлснөөс нь арай хурдан болсон юм байна.

Талибан хөдөлгөөний тухайд, нэгэн төлөөлөгч Сухейль Шахин нь АНУ-д хандаж, улсынх нь соёл уламжлалд халдахгүй байхыг хүссэн. АНУ эмэгтэйчүүдэд боловсрол олгох, гивлүүргүй явах эрх өгөх зэргийг талибанаас шаардаж байгаа нь Афганистаны соёл уламжлалд халдаж байгаа хэрэг гэж талибанчууд үзэж байгаа аж.