Дурсамж
Бидний хайрт ээж Раднаагийн Дуламсүрэн нь 1939 онд Хөвсгөл аймгийн Галт суманд Зүрх багт айлын бага охиноор төрсөн. 1948-1952 онд сумын бага сургуулд суралцаж, 1952-1958 онд Улаанбаатар хотод 10-н жилийн 2-р дунд сургуульд суралцаж төгсөөд 1958-1963 онд Монгол улсын их сургуулийн Анагаах ухааны эмчилгээний ангид сурч, хүний их эмч мэргэжилтэй болсон. 1963-1965 онд Говь-Алтай аймгийн Эрдэнэ суманд их эмчийн салбарын эрхлэгчээр, 1965-1972 онд Улаанбаатар хотын Нэгдсэн 3-р эмнэлэгт Дотрын эмчээр, 1972-1987 онд Хөвсгөл аймгийн Тариалан сумын сангийн аж ахуйд их эмчээр, 1988-1993 онд Сэлэнгэ аймгийн Орхонтуул суманд тус тус ажиллаж байв. 1972 онд Дотрын нарийн мэргэжлийн курст, 1977 онд мэргэжил дээшлүүлэх сургалтанд, 1992 онд Уламжлалт анагаах ухааны эм зүйн мэргэжлээр суралцан мэргэжил боловсролоо дээшлүүлэн хүн ардынхаа эрүүл энхийн төлөө унтах нойр, идэх хоолоо хасан ажиллаж байлаа.

Цэл залуухан эмч Говь-Алтай аймгийн Эрдэнэ суманд очиж, сумын удирдлагуудтай тохиролцон гэр бариад, шинээр эмнэлэг байгуулан хүн амыг эрүүлжүүлэх, хүүхэд өндөр настан, жирэмсэн эхийн төрөлт, төрөх насны эмэгтэйчүүд, сумын хүн амын өвчлөлийн байдлыг судалж, эмнэлгийн хяналтанд авч ажиллах, хүн амын өсөлтийг нэмэгдүүлэх, эндэгдлийг бууруулах, халдварт өвчнөөс урьдчилан сэргийлэх, сумын хүн амын ахуй соёлыг сайжруулах, эмнэлгийн эмч, ажилчдын үйлчилгээг доголдолгүй, цаг тухайд нь хүргэхэд саадгүй байх бололцоог хангуулахын тулд ажиллаж байлаа. Хөвсгөл аймгийн Тариалан суманд хамгийн олон жил ажиллаж, төрсөн эхчүүдэд амрах байртай болгон мөн сургууль цэцэрдэг амрах байрны хүүхдүүдийг байгалийн жимс жимсгэний хуримтлалаар витаминжуулах ажлыг хавар бүр зохион байгуулж байв. 

Ээж минь та нутаг усандаа сайн нэртэй эмч байгаад төдийгүй охидынхоо 3 хүүхдийг эх барьж авсан боосон ээж, хүүхдүүддээ залуу ээж, ах дүү нартаа Маам, ач зээ нартаа Өндөр эмээ нэртэй сайхан ээж, эмээ, эгч байлаа. Миний ээж бидэндээ ажлаа тарахыг нь тэсэн ядан хүлээдэг, ажилсаг, сайхан цагаан шүдээрээ яралзтал сайхан инээдэг, яриа хөөрөөтэй, тэгшхэн сайхан хөлтэй, ганган, гоё ээж, аавын минь хайртай хань нь байлаа. 

5,6,7-р арван жилийн гавшгайч, Ардын хувьсгалын 60,70 жилийн хүндэт медалиуд, Улаан загалмайн нийгэмлэгийн тэргүүний ажилтан, Эрүүлийг хамгаалахын тэргүүний ажилтан, Хөдөө аж ахуйн тэргүүний ажилтан цол хэргэмүүдээр тус тус шагнагдаж хөдөлмөрөө үнэлүүлсэн сумын депутат байв. 

Хайрт ээж минь үр хүүхэд, ач зээ нарынхаа зүрх сэтгэлд үүрд мөнх хадгалагдан үлдэх болно.

Үр хүүхэд, ач зээ нар нь. 2023.06.25 Улаанбаатар хот