ЭХЭМҮТ-ийн Эрчимт эмчилгээний тасгийн эмч өчигдөр шөнө ажиллаж байх үедээ нас баржээ. Уг харамсалтай хэрэгтэй холбоотойгоор ЭХЭМҮТ-өөс мэдээлэл гаргасан байна. 

Тус мэдэгдэлд, "Эх барих эмэгтэйчүүд, мэдээгүйжүүлэлт хагалгааны нэгдсэн тасгийн их эмч Х нь 2021 оны 11 сарын 02-03-нд шилжих шөнө энгийн эх барих эмэгтэйчүүдийн эмнэлгийн эрчимт эмчилгээний тасагт  ээлжийн эмчээр жижүүрлэн ажиллаж байсан юм.

Их эмч Х нь 2021 оны 11 дүгээр сарын 03 өдрийн өглөө ажлын байран дээрээ гэнэт нас барсан байна. Тэрээр ажил үүргийнхээ дагуу өвчтөнгүүдээ үзэж дуусаад амрахаар амрах өрөөндөө орсон болно. Эмчийг өрөөнд нь орсноос хойш хэсэг хугацааны дараа сувилагч дуудахаар очиход зүрх нь зогссон байдалтай байсан бөгөөд яаралтай тусламжийн арга хэмжээг авсан боловч зүрх, амьсгал сэргээгүй. Талийгаач Х нь хуваарийн дагуу ажилдаа гарахдаа ямар нэгэн зовиургүй байсан бөгөөд нас барсан шалтгааныг тодруулахаар шүүх эмнэлгийн шинжилгээний баг ажиллаж байгаа болно. Тэрээр энгийн эх барих эмэгтэйчүүдийн тасагт жижүүртэй хонож байсан бөгөөд ЭХЭМҮТ-ийн Эх барих, эмэгтэйчүүдийн эмнэлэгт 16 жил ажиллаж байсан туршлагатай эмч байлаа. 
Гүн эмгэнэл илэрхийлье" гэжээ.