Сэлэнгэ аймгийн Сайхан сумын Дэрст булан гэх газар есдүгээр сарын 24-ны 19:00 цагийн үед дөрвөн хүн зугаалж явснаас иргэн Э нь сураггүй болжээ. Тиймээс эрэн хайх ажиллагаанд дэмжлэг үзүүлэн ажиллах тухай хүсэлтийг Сайхан сумын Сум дундын Цагдаагийн хэлтсээс есдүгээр сарын 29-ны 12:40 цагт хүлээн авсан. Эрэн хайх ажиллагааг тус өдрөөс энэ сарын 1-ийг  дуустал зохион байгуулсан боловч үр дүнд хүрээгүй тул түр зогсоосон байна. Мөн сураггүй болсон иргэний ар гэрийнхнээс дахин эрэн хайх ажиллагаа явуулах тухай хүсэлтийг энэ сарын 5-ны өдөр хүлээн авсан.   

    Тус аймгийн Онцгой байдлын газрын Эрэн хайх, аврах анги, Сайхан сум дахь Гал түймэр унтраах, аврах 61 дүгээр анги, тус сум дахь Цагдаагийн хэсгийн алба хаагчид, ар гэрийнхний хамт тус сумын харьяат Э 61 настай эрэгтэйг эрэн хайх ажиллагааг өчигдөр 10:01 цагаас 17:20 цаг хүртэл Номгон багийн Дэрстэй хошуу гэх газраас Хар-Усан тохой гэх газар хүртэл усаар нийт 37 км-т завьтай урсаж, голын эрэг дагуу явганаар зохион байгуулсан боловч үр дүнд хүрээгүй тул ар гэрийнхэнтэй нь зөвшилцөж эрлийн ажиллагааг зогсоосон байна.