Хүүхэд хамгааллын асуудлаар холбогдох байгууллагаас өнөөдөр мэдээлэл өглөө.

Нийслэлийн гэр бүл, хүүхэд, залуучуудын газрын дарга Ө.Ган-Өлзий "Хөдөлмөрийн тухай хуулийн 43.3-т зааснаар ажил олгогч нь ажил, амралтын цагийг зохицуулах, хөдөлмөр эрхлэлтийн уян хатан нөхцөл зэргийг хангах, хүүхэд хамгааллын бодлогыг хэрэгжүүлэх эцэг эхийн зөвлөлийг байгуулна гэсэн заалтын хүрээнд "Нэгдүгээрт хүүхэд", "Нэгдүгээрт шалга" уриатай ажлын зохион байгууллаа.

Энэ хүрээнд албан байгууллагууд дээр эцэг эхийн зөвлөлийг байгуулсан юм. Одоогийн байдлаар эцэг эхийн зөвлөлөөр дамжуулан гэрийн аюулгүй байдлыг үнэлж, хүүхдийн эрсдэлгүй орчныг бий болгох байдлаар судалгаа аваад байна. Хоёрдугаарт хүүхдийн тоглож байгаа болон сургуулийн орчныг үнэлүүлсэн. Үүний үр дүнд 150 гаруй зөрчлийг илрүүллээ. Тухайлбал байгууллагууд дээрх орчны аюулгүй байдлын зөрчлийг засаж, сайжруулсан байгаа.

Эцэг эхийн зөвлөлөөр дамжуулан хүүхдийг эерэг хүмүүжүүлэх арга, гэр бүлийн боловсрол олгох сургалтуудыг зохион байгуулж байна" хэмээн ярилаа.

Хүүхдийн тусламжийн 108 утасны үйлчилгээний төвийн захирал н.Отгонгэрэл "Энэ оны эхний есөн сарын хугацаанд 108 дугаарт ирсэн 70,096 гаруй дуудлагын 10 мянга гаруй хүүхдэд хамгааллын үйлчилгээ шаардлагатай мэдээлэл бүртгэгдсэн. Үүний 70 гаруй хувьд хүүхэд хамгааллын үйлчилгээг хүргээд дараагийн шатны буюу хөгжлийн үйлчилгээ рүү холбон зуучилсан. 30 гаруй хувьд нь хүүхэд хамгааллын үйлчилгээний кэйс нээгээд анхан шатны үйлчилгээ үзүүлж байна.

Хүүхэд хамгааллын үйлчилгээ нь удаан хугацаагаар буюу доод тал нь гурван сараас дээш хугацаагаар үйлчилгээ үзүүлж байж бүрэн дүүрэн болдог.

Гэр бүл рүү чиглэсэн үйлчилгээ, хамгаалах, нөхөн сэргээх, эрүүл мэндийн болон боловсролын байгууллагатай хамтарч байж хүүхэд хамгааллын үйлчилгээг үзүүлдэг.  Эдгээр 10 мянга гаруй хүүхдэд хамгааллын үйлчилгээ үзүүлж байгаа гэж ойлгож болно.

Хүүхдийн тусламжийн 108-д орж ирсэн дуудлага 30 минутын дотор анхан шатны байгууллагад шилжсэний дараа цааш хамтарсан багт шилждэг. Сошиалд хүүхэдтэй холбоотой гарч буй мэдээллийн талаарх дуудлага 108 дугаарт өгсөн бол анхан шатны тусламжийн багт заавал очиж байгаа" гэв.