Үндэсний Статистикийн Хорооны дарга Б.Батдаваа Япон улсын “JDS тэтгэлэгт хөтөлбөр”-ийн ахлах мэргэжилтэн Хаяаши Ецүко, Монгол Улс хариуцсан мэргэжилтэн Касамацу Маки, Олон улсын хөгжлийн төвийн ахлах судлаач Шүхэ Огучи тэргүүтэй төлөөлөлтэй уулзлаа. 

Энэ үеэр ҮСХ-ны дарга Б.Батдаваа Монголын статистикийн салбарын хүний нөөцийн нөхцөл байдал, мэргэжлийн боловсон хүчний эрэлт болон учирч буй сорилт, цаашид мэргэших хэрэгцээ, шаардлагын талаар танилцууллаа. Түүнчлэн ирэх дөрвөн жилд хэрэгжих “JDS тэтгэлэгт хөтөлбөр”-ийн шинэчилсэн төсөлтэй танилцлаа. 

Энэ хүрээнд салбарт эрэлттэй байгаа өгөгдлийн шинжлэх ухаан, мэдээллийн технологи, өгөгдлийн шинжээч чиглэлээр суралцаж, статистикийн салбарын албан хаагчид илүү нарийн мэргэшиж, ур чадвараа хөгжүүлэх боломжийн талаар санал солилцлоо. 

Дашрамд мэдээлэхэд Монгол, Японы Засгийн газар хамтран 2001 оноос “Хүний нөөцийг хөгжүүлэх "JDS тэтгэлэгт хөтөлбөр”-ийг хэрэгжүүлж буй. Энэхүү хөтөлбөрийн хүрээнд Японы их, дээд сургуулиудын магистр, докторын хөтөлбөрт Үндэсний Статистикийн Хорооны албан хаагчид жил бүр хамрагдаж, салбарын хөгжилд бодит хувь нэмрээ оруулж байна.