“Монгол Улсын эрүүгийн хууль тогтоомжийн шинэтгэл" сэдэвт эрүүгийн эрх зүйн эрдэм шинжилгээний хурал МУИС-ийн номын санд өнөөдөр боллоо. 

Одоогоор хүчин төгөлдөр мөрдөгдөж буй эрүүгийн хэрэг хянан шийдвэрлэх тухай хууль 2002 онд анх удаа өөрчлөгдсөн. Түүнээс хойш 2017 оны тавдугаар сарын 18-нд тус хуулийг шинэчлэн баталсан байна. 

Хурлын үеэр МУИС-ийн эмерит профессор, Академич С.Нарангэрэл өнөөгийн хэрэглэж буй эрүүгийн хуулийг яагаад шинэчлэх шаардлагатайг тайлбарлав. 

Тэрбээр "Бидний өнөөдөр хэрэглэж буй эрүүгийн хэрэг хянан шийдвэрлэх тухай хууль нь өмнөх хуулийнхаа уламжлалыг үгүйсгэсэн. Монголын хөрсөнд тохирохгүй гаднын улсын хууль заалтыг сайн хөрвүүлэхгүйгээр оруулж ирснээс болоод эрүүгийн хуулийг ойлгоход нэн төвөгтэй байдал үүссэн. 

Тухайлбал энэ оны тавдугаар сард шүүгч, прокурор, мөрдөгч гэх мэт 808 хүнээс одоогийн мөрдөгдөж буй эрүүгийн хуулийг шинэчлэх шаардлагатай юу гэсэн социологийн асуулга явуулахад 81 хувь нь нэн даруй шинэчлэх ёстой гэсэн. 

Эрүүгийн хууль гэдэг нь тухайн улсынхаа гэмт халдлага, хорт уршгаас хамгаалахад чухал үүрэг гүйцэтгэж байдаг. Жишээлбэл эрэгтэй эмэгтэй хоёр эд хөрөнгөнөөсөө болж маргалддаг. 

Гэтэл одоогийн эрүүгийн хуулиар гэрлэгсдийн хооронд хуваарьт болон дундын өмчийн талаар маргаан үүсвэл гэр бүлийн хүчирхийллийн гэмт хэрэг гээд заачихсан. Үнэн хэрэгтээ тэр маргаан иргэний хэргээр шийдвэрлүүлэх ёстой. 

Мөн авлигын хэргийн талаарх томьёолол нь ойлгомжгүй байгаа. Аль нэг албан тушаалтан давуу байдал тогтоосон бол авлига гэж тусгасан. Үнэндээ авлигын хэрэг гэдэг нь өөрийнхөө албан тушаалынхаа хийх ёстой, ёсгүй ажилд мөнгө шан харамж эд хөрөнгийн авсныг тодорхойлдог. Иймэрхүү байдлаар маш тодорхой болгох асуудлууд байна" хэмээн ярив.