Монголбанкны Мөнгөний бодлогын хорооны 2026 оны есдүгээр сарын 16, 17-ны өдрүүдэд хуралдсан ээлжит хурлаар бодлогын хүүг 12.5 хувьд хэвээр хадгалах шийдвэр гаргалаа.

Хурлаар инфляц, эдийн засгийн өсөлт, банк, санхүүгийн зах зээлийн нөхцөл байдал болон дотоод, гадаад орчны эрсдэлийг харгалзан үзсэн байна.

2026 оны наймдугаар сарын байдлаар улсын хэмжээнд жилийн инфляц өмнөх сараас 0.5 нэгж хувиар буурч 12.5 хувь, Улаанбаатар хотод 1.4 нэгж хувиар буурч 11.6 хувь болжээ. Инфляц буурахад мах, хүнсний ногооны нийлүүлэлт нэмэгдэж, дотоодын хүнсний үнийн өсөлт саарсан нь голлон нөлөөлсөн байна.

Харин шатахууны үнийн өсөлт, түүний дам нөлөө, дэлхийн хүнсний үнийн өсөлт, төсвийн зардал болон цалингийн өсөлтөөс шалтгаалан инфляц дахин нэмэгдэх эрсдэлтэй байгааг Монголбанк онцоллоо.

Эдийн засаг 2026 оны эхний хагаст 7.7 хувиар өссөн бөгөөд үүнд уул уурхай, тээврийн салбар голлон нөлөөлсөн байна. Энэ онд уул уурхай, тээврийн салбарын өсөлт эрчимжих төлөвтэй байгаа бол хөдөө аж ахуй, аж үйлдвэрийн салбарын өсөлт саарах төлөвтэй байна.

Мөн Ойрх Дорнодын зөрчилдөөнөөс шалтгаалан газрын тос, эрчим хүчний үнэ өсөж, дэлхийн инфляцын дарамт нэмэгдэх эрсдэлтэй байгаа аж. Харин дэлхийн зах зээл дэх алт, зэсийн үнэ өндөр түвшинд хадгалагдаж байгаа нь Монгол Улсын худалдааны нөхцөлд эерэгээр нөлөөлж, гадаад валютын нөөцийн хүрэлцээ сайжран, төгрөгийн ханш харьцангуй тогтвортой байна гэж үзжээ.

Монголбанк инфляцыг ирэх оны хоёрдугаар улирлаас алгуур саарч, оны эцэст зорилтын дээд интервалын орчимд хүрэх төлөвтэй гэж мэдээлэв.

Гэхдээ энэ оны төсвийн тодотгол болон ирэх оны төсвийн төсөл хэрхэн батлагдахаас шалтгаалан инфляцын цаашдын төлөвт томоохон өөрчлөлт гарах эрсдэлтэй байна.

Цаашид инфляцын өрнөл, нийлүүлэлтийн шинжтэй хүчин зүйлс, гадаад болон дотоод эдийн засгийн нөхцөл байдлын өөрчлөлтөөс хамааран Мөнгөний бодлогын хороо бодлогын дараагийн алхмыг тухай бүр авч хэрэгжүүлэхээр болжээ.

Эх сурвалж: Монголбанкны Мөнгөний бодлогын хороо
2026 оны есдүгээр сарын 17

Мөнгөний бодлогын хорооны хурлын хураангуй тэмдэглэлийг хоёр долоо хоногийн дараа Монголбанкны цахим хуудсанд байршуулна.