Түмэн олныг гийгүүлэгч, Банчин Ойбрүл Ринбүчи багш Их Амгалан өрхийн эмнэлэгт умайн хүзүүний хорт хавдрыг эрт илрүүлэхэд зориулсан хиймэл оюун ухаанд суурилсан 25 сая төгрөгийн өртөг бүхий CerviCare AI камерыг хандивлалаа. 5 секундэд 98% магадлалтайгаар умайн хүзүүний хавдрыг илрүүлэх чадвартай энэ төхөөрөмжөөр дамжуулан олон эмэгтэйн өвчнийг эрт үед нь илрүүлж, цаг алдалгүй эмнэлгийн тусламж, эмчилгээ авах боломж бүрдүүлж байна. Ринбүчи багш эмэгтэйчүүдийн эрүүл мэндийг онцгойлон чухалчилж:

-Монголд умайн хүзүүний хорт хавдраар өдөрт 1-2 эмэгтэй өөд болдог, дэлхийд энэ өвчлөлтөөр дээгүүр байр эзэлдэг тухай, охид 11 наснаас эрт илрүүлэгт орох болсон гэх судалгааг сонсоод миний сэтгэл ихэд зовнив. Монголын бүх ээжүүд эрүүл энх байж, нэг ч гэсэн хүүхэд ээжийгээ бүү алдаасай, олон хүнд тусыг хүргээрэй гэж айлдлаа. Түүнчлэн Ринбүчи багш тус эмнэлэгт 2017 онд нярайн шарлалтыг хэмжих зориулалттай багаж хандивлаж байсан түүхтэй. Тухайн онд уг багажаар нярайн шарлалтыг цаг алдалгүй илрүүлж, эмчилгээ авах боломж бүрдсэнээр найман нярайн амь насыг аврахад бодит хувь нэмэр оруулсан бөгөөд өнөөдөр ч уг төхөөрөмж хэвийн ажиллаж, эмнэлгийн тусламж үйлчилгээнд ашиглагдаж байгааг сонсоод Ринбүчи багш сэтгэл нэн их хангалуун, баяртай байлаа.

Ринбүчигийн бэлэглэсэн CerviCare AI камер ч мөн адил олон эмэгтэйд эрт илрүүлэг, оношилгоонд хамрагдах боломж олгож, олон ээжийн амь насыг хамгаалахад үнэтэй хувь нэмэр оруулна гэдэгт итгэлтэй байна.